కొద్ది నెలలుగా మిడతల బెడదతో సతమతమవుతోన్న పాకిస్థాన్కు చైనా సాయం చేసేందుకు సిద్ధమైంది. లక్షకుపైగా బలమైన బాతుల దండును పాకిస్థాన్కు పంపేందుకు కసరత్తు చేస్తున్నట్లు చైనా స్థానిక మీడియా వెల్లడించింది.
తూర్పు చైనా ఝెజియాంగ్ రాష్ట్రం నుంచి... కమల పుష్పాలను తినే నీటి పక్షుల దళాన్ని సైతం పంపించనున్నట్లు తెలుస్తోంది. వీటితో పాటు నిపుణుల బృందమూ పాక్కు వెళ్లే అవకాశం ఉన్నట్లు మీడియా పేర్కొంది.
అయితే పాకిస్థాన్కు బాతులను పంపించే విషయమై ప్రభుత్వ అధికారులను సంప్రదించగా... వారి నుంచి ఎలాంటి సమాధానం రాలేదు.
బాతులే ఎందుకు!
క్రిమి సంహారకాలతో పోలిస్తే ఈ బాతులను ఉపయోగించడం వల్ల పర్యావరణానికి మేలు కలుగుతుంది. అంతేకాక ఇది తక్కువ ఖర్చుతో కూడుకుంది. ఈ కారణంగా చైనా ప్రభుత్వం వీటిని ఎప్పటినుంచో ఉపయోగిస్తోంది. కీటకాలను నాశనం చేయడానికి ఇరవై ఏళ్ల క్రితం నుంచే వీటిని వాడుతోంది.
ఒక బాతు రోజుకు 200 మిడతలను తినగలదు. కోళ్లతో పోలిస్తే ఈ సంఖ్య మూడు రెట్లు ఎక్కువ. దీంతో కోళ్ల కంటే బాతులను ఉపయోగించడమే మేలని పరిశోధకులూ సూచిస్తున్నారు. బాతులు ఒకేచోట గుంపులుగా ఉంటాయి కాబట్టి వాటిని అదుపు చేయడం కూడా తేలికేనని చెప్పుకొచ్చారు.
మిడతల సంక్షోభంలో పాక్
గతేడాది నుంచి పాకిస్థాన్లోని పంజాబ్, సింధ్ రాష్ట్రాలు తీవ్రమైన మిడతల సమస్యను ఎదుర్కొంటున్నాయి. పెద్ద ఎత్తున మిడతల గుంపు ఆ ప్రాంతాల్లోని పంట పొలాలను నాశనం చేస్తున్నాయి. ఫలితంగా దేశంలో తీవ్ర ఆహార సంక్షోభం ఏర్పడింది. నష్టనివారణ చర్యలు చేపట్టిన ఇమ్రాన్ ఖాన్ ప్రభుత్వం... పాక్లో అత్యయిక పరిస్థితిని ప్రకటించింది. సంక్షోభాన్ని అధిగమించడానికి సుమారు రూ. 730 కోట్లు అవసరమని అంచనా వేసింది.
ఇదీ చదవండి: కరోనా సోకలేదని అబద్ధం చెప్పినందుకు కేసు!
