ప్రాణాంతక కరోనా వైరస్తో చైనా అల్లాడిపోతోంది. ఈ మహమ్మారి బారినపడి ఇవాళ ఒక్కరోజే 105మంది ప్రాణాలు కోల్పోయారు. అందులో 100మంది హుబెయ్ రాష్ట్రానికి చెందిన వారే ఉండటం గమనార్హం.
చైనాలో మొత్తం మృతుల సంఖ్య 1,770కు చేరింది. కొత్తగా మరో 2,048 మంది వైరస్ బారిన పడ్డారు. చైనాలో ఇప్పటివరకు 70,548 మందికి ఈ వైరస్ సోకినట్టు స్పష్టం చేసింది ఆ దేశ ఆరోగ్య శాఖ. 10,844 మంది వైరస్ నుంచి తేరుకుని డిశ్చార్జి అయినట్లు తెలిపింది. 7,264 అనుమానిత కేసులు నమోదైనట్లు వెల్లడించింది.
కేసులు తగ్గుతున్నా.. అప్రమత్తత అవసరం..
వైరస్ కేంద్ర బిందువైన వుహాన్ మినహా.. చైనావ్యాప్తంగా వైరస్ కేసులు తగ్గుతున్నట్టు అధికారులు వెల్లడించారు. అయితే కరోనా ఎప్పుడు ఎలా విజృంభిస్తుందో చెప్పలేమని.. నిత్యం అప్రమత్తంగా ఉండాలని ప్రపంచ ఆరోగ్య సంస్థ(డబ్ల్యూహెచ్ఓ) సూచించింది.
నౌకలోని ఆ 40మందికి...
మరోవైపు జపాన్లో నిర్బంధంలో ఉన్న నౌకలోని 40మంది అమెరికన్లకు వైరస్ సోకినట్టు నిర్ధరించారు. అయితే నౌకలోని అగ్రరాజ్య పౌరులను తరలించేందుకు ఏర్పాటు చేసిన కార్యకలాపాలకు ఈ 40మంది దూరంగా ఉంటారని యూఎస్ స్పష్టం చేసింది.
