కరోనా మూలాలను కనుగొనేందుకు మరో విడత దర్యాప్తు చేపడతామన్న డబ్ల్యూహెచ్ఓ ప్రకటనపై చైనా స్పందించింది. డబ్ల్యూహెచ్ఓ ప్రకటన తమను.. షాక్కు గురిచేసిందని పేర్కొంది. ఈ మేరకు ఆ దేశ ఆరోగ్య శాఖ సహాయ మంత్రి జెంగ్ యిక్సిన్ గురువారం వ్యాఖ్యానించారు. కరోనా వుహాన్ ల్యాబ్ నుంచి లీక్ అయిందన్న వాదనలను కొట్టిపారేశారు. ఈ వదంతులు సైన్స్కు విరుద్ధమైనవని పేర్కొన్నారు.
మహమ్మారికి చైనాలోని వుహాన్ ల్యాబే మూలం అనే వాదన అమెరికా అధ్యక్షుడు డొనాల్డ్ ట్రంప్ హయాంలో మొదలైంది. చైనా వుహాన్ ల్యాబ్లో కరోనాకు సంబంధించి ఉన్న వివరాలను తొలగించే ప్రయత్నం చేస్తోందన్న కథనాలు ఈ వాదనలకు బలం చేకూర్చాయి. డబ్ల్యూహెచ్ఓ మొదట ఈ వాదనలను తోసిపుచ్చినా.. ప్రపంచ దేశాల ఒత్తిడితో వైరస్ మూలాలు తెలుసుకునేందుకు చైనాలో పర్యటన చేపట్టింది. అయితే ఆ పర్యటనలో ఆశించిన ఫలితాలు రాకపోవడం వల్ల ప్రపంచ దేశాలు అసంతృప్తి వ్యక్తం చేశాయి.
మరోసారి..
ఇందుకు డబ్ల్యూహెచ్ఓ కొద్ది రోజుల క్రితం కీలక వ్యాఖ్యలు చేసింది. మహమ్మారి వ్యాప్తికి చైనాలోని ల్యాబ్ లీక్కు సంబంధం లేదని ఓ నిర్ణయానికి రావడం సరికాదని పేర్కొంది.
అయితే చైనా మాత్రం మొదటి నుంచి కరోనా వైరస్ పుట్టుకపై వస్తున్న వాదనలను తోసిపుచ్చుతోంది. అంతేకాదు.. వుహాన్ శాస్త్రవేత్తల బృందం కరోనాపై చేస్తున్న పరిశోధనలకు వైద్య రంగంలో నోబెల్ బహుమతి ఇవ్వాలని డిమాండ్ చేసింది.
ఇదీ చదవండి : సరిహద్దుల్లో చైనా దుడుకుతనం ..!
