కరోనా మహమ్మారి కారణంగా యావత్ ప్రపంచం తీవ్రంగా ప్రభావితమైంది. ఈ క్రమంలో వైరస్ మూలాలను కనుగొనేందుకు ప్రపంచ ఆరోగ్య సంస్థ దర్యాప్తు అనివార్యమైంది. డబ్ల్యూహెచ్ఓ దర్యాప్తునకు ముందు వైరస్ మూలాలపై కీలక వ్యాఖ్యలు చేసింది చైనా. కొవిడ్-19 కేసులు తొలుత వెలుగు చూసినంత మాత్రానా.. ఈ మహమ్మారి వుహాన్లో ఉద్భవించినట్లు కాదని పేర్కొంది.
భారత్ సహా పలు దేశాల నుంచి దిగుమతి చేసుకున్న ఆహార పదార్థాల్లో వైరస్ను గుర్తించినట్లు చైనాకు చెందిన పలు మీడియా సంస్థలు కొద్ది రోజుల క్రితం కథనాలు ప్రచురించాయి. విదేశాల నుంచే చైనాలోకి వైరస్ ప్రవేశించినట్లు ఆరోపించాయి. ఈ నేపథ్యంలో వైరస్ మూలాలపై అడిగిన ప్రశ్నకు.. చైనాలో తొలుత గుర్తించినంత మాత్రాన ఇక్కడే పుట్టినట్లు కాదని పేర్కొన్నారు ఆ దేశ విదేశాంగ శాఖ ప్రతినిధి ఝావో లిజియన్.
“ కరోనా వైరస్ తొలుత వెలుగు చూసినప్పటికీ, వైరస్ ఉద్భవించిన ప్రదేశం చైనా అని దాని అర్థం కాదు. వైరస్ మూలాలను కనుగొనే ప్రక్రియ చాలా క్లిష్టమైన శాస్త్రీయ సమస్యగా భావిస్తున్నాం. అందుకు ప్రపంచవ్యాప్తంగా ఉన్న శాస్త్రవేత్తల సహకారం అవసరం. వైరస్ మూలాలను కనుగొనే ప్రక్రియ చాలా దేశాలు, ప్రాంతాలతో ముడిపడి నిరంతరం కొనసాగే ప్రక్రియ. కాబట్టి మేము భవిష్యత్తులో ఎదురయ్యే ప్రమాదాలను అడ్డుకునేందుకే ప్రయత్నిస్తాం.”
- ఝావో లిజియన్, చైనా విదేశాంగ శాఖ ప్రతినిధి.
ప్రపంచ ఆరోగ్య సంస్థ (డబ్ల్యూహెచ్ఓ) కరోనా మూలలపై దర్యాప్తు చేసేందుకు త్వరలోనే చైనాకు బృందాన్ని పంపనున్న క్రమంలో ఈ మేరకు లిజియన్ వ్యాఖ్యానించటం ప్రాధాన్యం సంతరించుకుంది.
ప్రపంచాన్ని అతలాకుతలం చేస్తోన్న కరోనా వైరస్ చైనాలోనే పుట్టిందని అమెరికా అధ్యక్షుడు డొనాల్డ్ ట్రంప్ పలు సందర్భాల్లో పేర్కొన్నారు. దానిని చైనా వైరస్గానే అభివర్ణిస్తూ..డ్రాగన్ దేశంపై విమర్శలు చేశారు. వైరస్ను చైనా కట్టడి చేయగలిగిందన్న డబ్ల్యూహెచ్ఓ వాదనలనూ ఖండించారు. ఈ క్రమంలోనే డబ్ల్యూహెచ్ఓకు నిధులను నిలిపివేయటం సహా డబ్ల్యూహెచ్ఓ నుంచి వైదొలుగుతున్నట్లు ప్రకటించారు. వూహాన్లోని బయోల్యాబ్లో నుంచి వైరస్ ఉద్భవించిందన్న వాదనలు మొదటి నుంచి కొట్టిపారేస్తోంది చైనా.
ఇదీ చూడండి: చైనాపై 'కరోనా' దర్యాప్తునకు డబ్ల్యూహెచ్ఓ చర్యలు
