ప్రాణాంతక కరోనా వైరస్పై యుద్ధానికి ముమ్మర చర్యలు చేపట్టింది చైనా. శరవేగంగా ఆసుపత్రులను నిర్మిస్తున్న డ్రాగన్ దేశం... తాజాగా వైరస్ను నిరోధించేందుకు దాదాపు 4 మిలియన్ డాలర్ల నిధులను కేటాయించింది. పనులకు ఆటంకం కలగకుండా.. ఈ నిధులను సక్రమంగా వినియోగించాలని ఆదేశాలు జారీ చేసింది.
వుహాన్ కేంద్రబిందువుగా విజృంభిస్తున్న ఈ మహమ్మారి వల్ల ఇప్పటికే 170మంది ప్రాణాలు కోల్పోయారు. కరోనాకు సంబంధించి 7వేలకుపైగా కేసులు నమోదయ్యాయి.
విరాళాలతో ముందుకు..
గడ్డు పరిస్థితులను ఎదుర్కొంటున్న చైనాకు దిగ్గజ వ్యాపారవేత్తలు అండగా నిలుస్తున్నారు. డ్రాగన్ దేశంలోనే రెండో అత్యంత ధనికుడు, అలీబాబా వ్యవస్థాపకుడు జాక్ మా.. ప్రభుత్వానికి సాయం చేసేందుకు ముందుకు వచ్చారు. దాదాపు 14మిలియన్ డాలర్ల విరాళాలు అందించనున్నట్టు తెలిపారు. టీకాను అభివృద్ధి చేసేందుకు తన సంస్థలు కృషి చేయనున్నట్టు స్పష్టం చేశారు.
ప్రాణాంతక వైరస్తో పోరులో భాగంగా 10 మిలియన్ డాలర్లను చైనా, ఆఫ్రికా దేశాలకు అందించనున్నట్టు గేట్స్ ఫౌండేషన్ ప్రకటించింది.
సంబంధాలు కట్...
మరోవైపు వైరస్ భయం వల్ల డ్రాగన్ దేశం నుంచి ఒక్కో దేశం దూరం జరుగుతోంది. ఇప్పటికే అనేక దేశాలు తమ విమాన సేవలను రద్దు చేసుకున్నాయి. తాజాగా తూర్పు సరిహద్దును మూసివేయనున్నట్టు రష్యా ప్రకటించింది. తమ పౌరుల భద్రతే ముఖ్యమని రష్యా ప్రభుత్వం స్పష్టం చేసింది. చైనా పౌరులకు ఎలక్ట్రానిక్ వీసాలను నిలిపివేస్తున్నట్టు రష్యా విదేశాంగశాఖ తెలిపింది.
బాక్సాఫీస్ విలవిల...
ప్రపంచంలోనే అతిపెద్ద జనాభా కలిగిన దేశం చైనాలో సినీ పరిశ్రమకు విపరీతమైన ఆదరణ ఉంది. అనేక భాషల్లోని చిత్రాలు డ్రాగన్ దేశంలో ప్రదర్శితమవుతాయి. కానీ కరోనా ధాటికి చైనాలోని దాదాపు 70వేల థియేటర్లు మూతపడ్డాయి. దీనితో అంతర్జాతీయ బాక్సాఫీస్ ఇప్పటికే 2 బిలియన్ డాలర్లు నష్టపోయింది. ముందు ముందు పరిస్థితి మరింత ఘోరంగా మారుతుందని సినీ వర్గాలు ఆవేదన వ్యక్తం చేస్తున్నాయి.
ఇదీ చూడండి:- కరోనా ఎఫెక్ట్: టోకెన్ ఉన్నవారికే మాస్క్ల విక్రయం!
