మయన్మార్లో తిరుగుబాటుకు వ్యతిరేకంగా నిరసన వ్యక్తం చేస్తున్న పౌరులను చంపడం ఆపాలని ఆ దేశ సైనిక ప్రభుత్వానికి ఆసియాన్ దేశాలు హితవు పలికాయి. నిర్బంధంలో ఉన్న రాజకీయ నేతలను విడుదల చేయాలని డిమాండ్ చేశాయి. ఇండోనేసియా రాజధాని జకర్తాలో జరిగిన అత్యవసర సమావేశంలో మయన్మార్ సైనిక ప్రభుత్వ అధినేతకు స్పష్టం చేశాయి.
ఈ మేరకు మయన్మార్ సైనిక ప్రభుత్వ అధినేత సీనియర్ జనరల్ మిన్ ఆంగ్ లాయింగ్తో శనివారం ఆసియాన్ దేశాధినేతలు చర్చలు జరిపారని ఇండోనేసియా అధ్యక్షుడు జోకో విడోడో తెలిపారు. మయన్మార్లో రెండు పక్షాల మధ్య చర్చలు ప్రారంభం కావాలని ఆసియాన్ దేశాలు ఆకాంక్షించినట్లు వెల్లడించారు. మయన్మార్లో ప్రస్తుతమున్న పరిస్థితులు ఎంత మాత్రం ఆమోదయోగ్యం కావని స్పష్టం చేశారు.
"హింస తప్పకుండా ఆగిపోవాలి. మయన్మార్లో శాంతి, స్థిరత్వం, ప్రజాస్వామ్యం పునస్థాపితం కావాలి. మయన్మార్ ప్రజల ప్రయోజనాలే ఆ దేశానికి ప్రాధాన్యం కావాలి."
-జాకో విడోడో, ఇండోనేసియా అధ్యక్షుడు
అయితే, మయన్మార్ సైనిక అధినేత లాయింగ్.. ఆసియాన్ దేశాలకు సమాధానం ఇచ్చారా అన్న విషయంపై స్పష్టత లేదు. సైనిక తిరుగుబాటు తర్వాత మయన్మార్ విడిచి బయటకు రావడం లాయింగ్కు ఇదే తొలిసారి.
700 మంది మృతి!
ఫిబ్రవరి 1న తిరుగుబాటు చేసి ప్రజాస్వామ్యయుతంగా ఎన్నికైన ప్రభుత్వాన్ని కూలదోసింది మయన్మార్ సైన్యం. ఈ తిరుగుబాటుకు వ్యతిరేకంగా పెద్ద ఎత్తున నిరసనలు జరుగుతున్నాయి. వీటిని అణచివేసేందుకు సైన్యం కఠిన చర్యలు చేపడుతోంది. సొంత పౌరులపైనే కాల్పులకు తెగబడుతోంది. ఇప్పటివరకు భద్రతా దళాల కాల్పుల్లో 700 మంది నిరసనకారులు చనిపోయినట్లు అంచనా.
ఇదీ చదవండి- ఇండోనేసియా జలాంతర్గామి శకలాలు లభ్యం
