ఆర్మేనియా ప్రధానమంత్రి నికోల్ పాషిన్యాన్ భార్య అన్నా హకోబ్యాన్.. కీలక నిర్ణయం తీసుకున్నారు. వివాదాస్పద నాగోర్నో-కరాబాఖ్ సరిహద్దులో పోరాడేందుకు యుద్ధ శిక్షణ తీసుకుంటున్నట్లు తెలిపారు. తనతో పాటు 13 మంది మహిళలు ఇందులో పాల్గొంటున్నట్లు చెప్పారు. ఈ మేరకు తన ఫేస్బుక్ ఖాతాలో సోమవారం ఓ పోస్ట్ చేశారు.
"నాతో పాటు 13 మందితో కూడిన మహిళా బృందం.. సైనిక శిక్షణలో పాల్గొంటోంది. అక్టోబర్ 27నుంచి ఈ శిక్షణ ప్రారంభమైంది. సరిహద్దులో పోరాడడానికి మేము కొద్ది రోజులు.. మా ఇళ్లను వీడుతున్నాం. ఆర్మేనియన్లు తమ జన్మభూమిని రక్షించడానికి చేసే తెగువ ఎలాంటిదో ప్రపంచానికి చూపే సమయం ఇది."
-- హకోబ్యాన్, ఆర్మేనియా ప్రధాని భార్య
కొనసాగుతున్న దాడులు..
మరోవైపు.. అజర్బైజాన్, అర్మేనియా మధ్య ఉద్రిక్తతలు కొనసాగుతున్నాయి. దీర్ఘశ్రేణి రాకెట్ల ద్వారా అజర్బైజాన్ దళాలు నగరంపై దాడి చేశాయని నాగోర్నో కరాబాఖ్ అధికారులు తెలిపారు. రిపబ్లికన్ మెడికల్ సెంటర్ వద్ద జరిగిన ఈ దాడిలో పలువురు గాయపడ్డారు. ఆస్పత్రిలోని రోగులను సురక్షిత ప్రాంతాలకు తరలించారు.
ఈ ఆరోపణలను అజర్బైజాన్ రక్షణ మంత్రి ఖండించారు. అర్మేనియా దళాలే తమపై దాడి చేశాయని అన్నారు. ఇందుకు సంబంధించి వీడియోలను విడుదల చేశారు. సైనిక వాహనాలు ధ్వంసమైన దృశ్యాలు వీడియోలో నిక్షిప్తమయ్యాయి. అయితే ఈ దాడి ఎప్పుడు, ఎక్కడ జరిగిందనే విషయాలు అజర్బైజాన్ వెల్లడించలేదు.
ఇదీ చూడండి:అజర్బైజాన్- ఆర్మీనియా రగడకు ఆ తప్పే కారణం!
ఇదీ చూడండి: అర్మేనియా- అజర్బైజాన్ శాంతి ఒప్పందానికి తూట్లు
