కరోనా... యావత్ ప్రపంచాన్ని వణికిస్తున్న వైరస్. ఆరోగ్యపరంగానే కాదు... ఆర్థికపరంగానూ పెను ప్రభావం చూపుతోంది ఆ మహమ్మారి. చైనాలో పరిశ్రమలు మూతపడి నేపథ్యంలో ప్రపంచ ఆర్థిక వ్యవస్థే కుప్పకూలుతుందన్న ఆందోళనలు నెలకొన్నాయి. స్మార్ట్ఫోన్ల ధరల పెరిగి, పెట్రోల ధరలు తగ్గవచ్చన్న విశ్లేషణలు వినిపిస్తున్నాయి.
ప్రపంచ దేశాలన్నింటిలో కరోనా ప్రభావం ఆర్థిక వ్యవస్థ చుట్టూ తిరుగుతుంటే... హాంకాంగ్లో మాత్రం పరిస్థితి భిన్నం. అక్కడ మిగిలిన అన్ని వస్తువులకన్నా టాయ్లెట్ పేపర్కు ఎక్కువ డిమాండ్ ఏర్పడింది. ఎంతలా అంటే... ఆయుధాలతో వచ్చిమరీ దోచుకెళ్లేంతగా.
కత్తులతో బెదిరించి...
హాంకాంగ్లోని మాంగ్ కాక్ జిల్లాలో సోమవారం తెల్లవారుజామున ఓ డెలివరీ బాయ్ను కొంత మంది దుండగులు కత్తితో బెదిరించారు. కొన్ని పెట్టెల టాయ్లెట్ పేపర్ ఎత్తుకెళ్లారు. వాటి విలువ దాదాపు 130 డాలర్లు.
సూపర్ మార్కెట్ సీసీటీవీ కెమెరాల్లో నమోదైన దృశ్యాల ఆధారంగా పోలీసులు దర్యాప్తు ప్రారంభించారు. సాయుధ దుండగుల కోసం విస్తృతంగా గాలిస్తున్నారు.
ప్రభుత్వం భరోసా ఇచ్చినా...
కరోనాతో టాయ్లెట్ పేపర్ సరఫరాపై ప్రభావం లేదని ప్రభుత్వం హామీ ఇచ్చినా... హాంకాంగ్ ప్రజలు నమ్మడం లేదు. దుకాణాల ముందు బారులు తీరి మరీ టాయ్లెట్ పేపర్ కొనుగోలు చేస్తున్నారు. బియ్యం, పాస్తా వంటి సరుకుల్నీ పెద్దమొత్తంలో కొని, నిల్వ చేస్తున్నారు.
ఇదీ చూడండి:- 'క్రూయిజ్షిప్'లో మరో ఇద్దరు భారతీయులకు కరోనా
