జమ్ముకశ్మీర్కు ప్రత్యేక అధికారాలు కల్పించే ఆర్టికల్ 370, 35-A రద్దు, రాష్ట్ర పునర్విభజన బిల్లు ఆమోదం అనంతరం.... పాక్ ప్రధాని ఇమ్రాన్ ఖాన్ ఆందోళన వ్యక్తం చేశారు. ఈ పరిణామాలతో రాష్ట్రంలో పుల్వామా తరహా దాడులు జరిగే అవకాశమున్నట్లు అభిప్రాయపడ్డారు.
దీనివల్ల రెండు దేశాల మధ్య యుద్ధం చెలరేగవచ్చన్నారు. 'ఆ యుద్ధంలో ఎవరూ గెలిచే పరిస్థితి ఉండదు. దాని ప్రభావం ప్రపంచవ్యాప్తంగా ఉంటుంది.' అని మంగళవారం జరిగిన పాకిస్థాన్ పార్లమెంటు సంయుక్త సమావేశంలో పేర్కొన్నారు. కశ్మీర్కు ప్రత్యేక ప్రతిపత్తి రద్దు నేపథ్యంలో ఈ భేటీ నిర్వహించారు.
ఇదీ చూడండి: 370 రద్దుతో కశ్మీర్లో వచ్చే మార్పులివే...
భారత ప్రభుత్వ నిర్ణయాలపై కశ్మీరీలు నిరసన తెలియజేస్తారని.. వారిని అణచివేసేందుకు కేంద్రం ప్రయత్నిస్తుందని తెలిపారు పాక్ ప్రధాని.
'ఇలాంటి పరిస్థితుల్లో పుల్వామా తరహా దాడులు పునరావృతమవుతాయి. అలాంటివి జరుగుతాయని ముందే ఊహించగలను. అప్పుడూ భారత్ మమ్మల్నే నిందిస్తుంది. మాపై దాడికి దిగుతుంది. మేమూ ప్రతిదాడి చేస్తాం. ఆ యుద్ధంలో ఎవరు గెలుస్తారు..? ఎవరూ గెలవరు. ఇది అణ్వస్త్ర బెదిరింపు కాదు.'
- ఇమ్రాన్ ఖాన్, పాక్ ప్రధాని
మోదీ సర్కారు తన సిద్ధాంతాలకు అనుగుణంగా కశ్మీర్లో ఈ చర్యను చేపట్టిందన్నారు ఇమ్రాన్. అది జాతి విద్వేష సిద్ధాంతమన్నారు. కశ్మీర్లో పరిస్థితిపై వివరించేందుకు ప్రపంచ దేశాల నేతలను సంప్రదిస్తామన్నారు ఇమ్రాన్ ఖాన్. ఐరాస భద్రతా మండలి సహా అన్ని వేదికలపైనా పోరాడతామన్నారు. అంతర్జాతీయ కోర్టును ఆశ్రయించే అంశాన్నీ పరిశీలిస్తున్నామని చెప్పారు.
