అఫ్గాన్ పరిణామాలు.. పాకిస్థాన్ ఉగ్రవాదులకు అండగా మారుతున్నాయా? భారత్పై దాడులు చేసేందుకు వారు ప్రణాళికలు రచిస్తున్నారా? అంటే అవుననే సమాధానం వినిపిస్తోంది. అఫ్గానిస్థాన్ను తాలిబన్లు హస్తగతం చేసుకున్న తర్వాత... పాకిస్థాన్కు చెందిన ఉగ్రవాదుల ఉనికి జమ్ముకశ్మీర్లో అధికమైంది. 2019లో ఆర్టికల్ 370ని కేంద్రం రద్దు చేసిన తర్వాత ముష్కరుల సంఖ్య పెరగడం ఇదే తొలిసారి. ఈ మేరకు ఓ అంతర్జాతీయ మీడియా 'ఈయూ టుడే' తన కథనంలో తెలిపింది.
అందరూ క్రియాశీలకంగా..
పాకిస్థాన్కు చెందిన ఉగ్రసంస్థలైన లష్కరే తోయిబా, జైషే మహమ్మద్కు చెందిన ముష్కరులు చాలా మంది.. దేశంలోకి చొరబడుతున్నారని ఆ పత్రిక తన కథనంలో తెలిపింది. అఫ్గాన్లోని హక్కానీ నెట్వర్క్తో ఈ ఉగ్రసంస్థలు కలిసి పని చేస్తున్నట్లు చెప్పింది. జులై నుంచి దాదాపు 50 మంది ఉగ్రవాదులు దేశంలోకి ప్రవేశించగా.. వారంతా ప్రస్తుతం క్రియాశీలకంగా ఉన్నట్లు చెప్పింది. పాకిస్థాన్లోని పంజాబ్ రాష్ట్రం సహా సరిహద్దు ప్రాంతాల నుంచి వారు జమ్ముకశ్మీర్లోకి ప్రవేశించారని పేర్కొంది.
దాడులకు ప్లాన్?
'2018లో క్రియాశీలక ఉగ్రవాదుల సంఖ్య అధికంగా ఉంది. అయితే.. జమ్ముకశ్మీర్కు కేంద్రం ప్రత్యేక హోదాను రద్దు చేసి, భద్రతను కట్టుదిట్టం చేశాక ఈ సంఖ్య తగ్గింది. కానీ, అఫ్గానిస్థాన్ను తాలిబన్లు ఆక్రమించుకున్నాక ఈ సంఖ్య అనూహ్యంగా పెరుగుతూ వచ్చిందని' ఆ కథనం తెలిపింది.
జమ్ముకశ్మీర్లో ఉగ్రవాదుల సంఖ్య పెరుగుతున్న నేపథ్యంలో.. దేశంలో ఉగ్రదాడులు జరిగే ప్రమాదం ఉందని నిపుణులు ఆందోళన వ్యక్తం చేస్తున్నారు. అఫ్గాన్లోని తాలిబన్లకు లష్కరే తోయిబా, జైషే మహమ్మద్ ఉగ్రవాదులు సహకరించలేదు. కానీ వాటి ప్రభావం మాత్రం ఉంది. ఇప్పుడు కశ్మీర్లో ఈ రెండు ఉగ్రసంస్థలు ఉనికిని పెంచుకుంటున్నాయి.
ఇవీ చూడండి:
