అఫ్గానిస్థాన్లో కొద్ది రోజులుగా తాలిబన్లు చేస్తోన్న దాడులకు ప్రతిస్పందనగా ప్రత్యేక ఆపరేషన్ చేపట్టాయి భద్రత దళాలు. గత నెల రోజుల్లో హెల్మండ్, కందహార్ రాష్ట్రాల్లో బలగాలు చేపట్టిన దాడుల్లో మొత్తం 70 మంది తాలిబన్ కమాండర్లు హతమయ్యారని ఆ దేశ అంతర్గత వ్యవహారాల శాఖ వెల్లడించింది.
ఈ ఆపరేషన్లో భాగంగా హెల్మండ్ రాష్ట్రంలో మరో 152 మంది పాకిస్థానీ ఉగ్రవాదులు హతమయ్యారని తెలిపారు అంతర్గత వ్యవహారాల శాఖ ప్రతినిధి తరీక్ అరియన్. బలగాల కాల్పుల్లో హతమైన తాలిబన్లలో 20 మంది హెల్మండ్లోని వివిధ ప్రాంతాలకు చెందిన వారిగా పేర్కొన్నారు.
" కందహార్లో హతమైన తాలిబన్ కమాండర్లలో 10 మంది ఉరుజ్గాన్, కందహార్, ఘజ్నీ నుంచి వచ్చారు. కందహార్లో మొత్తం 40 మంది కమాండ్లరు హతమయ్యారు. హెల్మండ్ దాడుల్లో సుమారు 30 మంది తాలిబన్ కమాండర్లు గాయపడ్డారు. "
- తరీక్ అరియన్, అంతర్గత వ్యవహారాల శాఖ ప్రతినిధి.
తాలిబన్ దాడులకు ప్రతిస్పందనగా హెల్మండ్, కందహార్ సహా ఇతర దక్షిణ రాష్ట్రాల్లో ప్రత్యేక ఆపరేషన్ చేపట్టినట్లు చెప్పారు తరీక్ అరియన్. ఇప్పటికీ దక్షిణ రాష్ట్రాల్లో ఇరువర్గాల మధ్య ఘర్షణలు కొనసాగుతున్నాయని తెలిపారు. గడిచిన 25 రోజుల్లో తాలిబన్లు చేపట్టిన దాడుల్లో మొత్తం 134 మంది పౌరులు మరణించగా, మరో 289 మంది తీవ్రంగా గాయపడినట్లు చెప్పారు.
ఇదీ చూడండి:అఫ్గానిస్థాన్లో ఉగ్రదాడి- ఐదుగురు మృతి
