రష్యా జోరు.. మరో కరోనా టీకాపై ప్రయోగం సక్సెస్​

వ్యాక్సిన్​ పరిశోధనల్లో రష్యా జోరు మీద ఉంది. ఇప్పటికే కరోనాకు తొలి వ్యాక్సిన్​ విడుదల చేసిన ఆ దేశం.. మరో టీకాకు కసరత్తులు ముమ్మరం చేసింది. ఈ టీకా పరిశోధనలో భాగంగా.. మనుషులపై చేసిన ప్రయోగం సురక్షితమని తేలినట్టు.. వలంటీర్లలో ఎలాంటి సైడ్​ ఎఫెక్ట్స్​ కనపడనట్టు పేర్కొంది.

కరోనాపై పోరులో ఇప్పటికే స్పుత్నిక్​ వ్యాక్సిన్​కు ఆమోదముద్ర వేసి ప్రపంచాన్ని ఆశ్చర్యపరిచిన రష్యా.. మరో టీకాను సిద్ధం చేస్తోంది. వెక్టర్​ స్టేట్​ రీసెర్చ్​ సెంటర్​ ఆఫ్​ వైరాలజీ బయోటెక్నాలజీ రూపొందిస్తున్న ఈ టీకా.. మనుషులపై చేసిన ప్రయోగాల్లో సురక్షితమని తేలినట్టు ఓ నివేదిక పేర్కొంది.

ఈ 'ఎపివాక్​కరోనా' వ్యాక్సిన్​ క్లినికల్​ ట్రయల్స్​ వచ్చే నెలలో పూర్తవుతాయని 'రష్యా ఫెడరల్​ సర్వీస్​ ఫర్​ సర్వీలియెన్స్​ ఆన్​ కన్జ్యూమర్​ రైట్స్​ ప్రొటెక్షన్​ అండ్​ హ్యూమన్​ వెల్​బీయింగ్​' సంస్థ వెల్లడించింది.

ఈ వ్యాక్సిన్​ను ఇప్పటివరకు 57 మంది వలంటీర్లపై ప్రయోగించినట్టు.. వీరిలో ఎలాంటి సైడ్​ ఎఫెక్ట్స్​ కనపడనట్టు సంస్థ పేర్కొంది.

ఈ నెల తొలి భాగంలో స్పుత్నిక్​ను విడదుల చేసింది రష్యా. తన సొంత కుమార్తె ఈ వ్యాక్సిన్​ తీసుకుని సురక్షితంగా ఉన్నట్టు ప్రకటించారు ఆ దేశాధ్యక్షుడు వ్లాదిమిర్​ పుతిన్​. అయితే మూడో దశ ట్రయల్స్​ పూర్తి కాకుండానే మార్కెట్​లోకి ఈ వ్యాక్సిన్​ను విడుదల చేయడంపై సర్వత్రా విమర్శలు.. టీకాపై అనుమానాలు వ్యక్తమవుతున్నాయి.

ఇదీ చూడండి:- వ్యాక్సిన్​ ఉత్పత్తిలో భారత్​ సాయం కోరిన రష్యా