అంతర్జాల దిగ్గజం యూట్యూబ్ సంస్థ కీలక నిర్ణయం తీసుకుంది. ఆన్లైన్లో అసత్య వార్తలను నిరోధించడంలో భాగంగా.. ఓటర్లను తప్పుదారి పట్టించే వీడియోలను తమ వెబ్సైట్నుంచి తొలగిస్తామని స్పష్టం చేసింది. అమెరికా అధ్యక్ష ఎన్నికలకు కొద్దినెలల ముందు ఈ మేరకు చర్యలు చేపట్టింది ఆ సంస్థ.
ఆరోగ్యకరమైన రాజకీయాలను ప్రోత్సహించి, నమ్మదగిన సమాచారాన్ని ప్రజలకు చేరువ చేయాలనే ఉద్దేశంతో ఈ నిర్ణయం తీసుకున్నట్లు తెలిపింది యూట్యూబ్. ఓటింగ్, జనాభా గణన విషయంలో వినియోగదారులను తప్పుదారి పట్టించే సమాచారంపైనా నిషేధం విధించనున్నట్లు గూగుల్ ఆన్లైన్ ట్రస్ట్ అండ్ సేఫ్టీ విభాగం సారథి క్రిస్టీ కానెగల్లో తెలిపారు.
"ఎన్నికల సమయంలో మా వినియోగదారులను అసత్య వార్తల నుంచి కాపాడాల్సిన బాధ్య మాపై ఉంది. ఇతర సాంకేతిక, ప్రభుత్వ సంస్థలతో కలిసి నకిలీ ఖాతాలను గుర్తించి వాటిని తొలగించేందుకు కృషి చేస్తున్నాం."
-క్రిస్టీ కానెగల్లో, గూగుల్ ఆన్లైన్ ట్రస్ట్ అండ్ సేఫ్టీ సారథి
అమెరికాలో 2016 ఎన్నికల్లో నకిలీ వార్తల వ్యాప్తి జోరుగా సాగిందన్న ఆరోపణల నేపథ్యంలో ఆన్లైన్ ప్లాట్ఫార్మ్లు ఈసారి ముందుజాగ్రత్త చర్యలు చేపట్టాయి. తమ వెబ్సైట్లో అన్ని రాజకీయ ప్రకటనలను నిషేధిస్తామని ట్విట్టర్ ఇటీవల ప్రకటించింది. ఫేస్బుక్ మాత్రం కొన్ని మినహాయింపులతో రాజకీయ ప్రకటనల కోసం 'హ్యాండ్ ఆఫ్' విధానాన్ని తీసుకొచ్చింది.
