కరోనా.. తీవ్ర భయాందోళనలను, ఒంటరితనాన్ని, మరణ ముప్పును మోసుకొచ్చినా, ప్రజల ఆనందం తరగలేదు! మహమ్మారి వెన్నులో వణుకు పుట్టించినా, తరగని సంతోషాన్ని సొంతం చేసుకుంది.. ఫిన్లాండ్! ప్రపంచంలోనే అత్యంత సంతోషకర దేశంగా అగ్రస్థానంలో నిలిచింది. శనివారం అంతర్జాతీయ ఆనంద దినోత్సవం కావడంతో.. 'ప్రపంచ ఆనంద నివేదిక-2021'ను ఐరాస విడుదల చేసింది. భారత్ మాత్రం మొత్తం పరిగణనలోకి తీసుకున్న 149 దేశాల జాబితాలో 139వ స్థానంతో సరిపెట్టుకుంది.
గత మూడు సంవత్సరాల మాదిరే ఈసారి కూడా ఫిన్లాండ్ తన రికార్డును పదిలం చేసుకొంది. ఆ తర్వాతి స్థానాలను వరుసగా ఐస్లాండ్, డెన్మార్క్, స్విట్జర్లాండ్, నెదర్లాండ్స్లు దక్కించుకున్నాయి. గత ఏడాది 18వ స్థానంలో ఉన్న అమెరికా ఈసారి 14వ స్థానానికి ఎగబాకింది. 2012 నుంచి ఐరాసకు చెందిన 'సస్టెయిన బుల్ డెవలప్మెంట్ సొల్యూషన్స్ నెట్వర్క్' ఏటా ప్రపంచ ఆనంద నివేదికను వెల్లడిస్తూ వస్తోంది.
టాప్-20లోకి చైనా..
మొత్తం 149 దేశాలను పరిగణనలోకి తీసుకున్నా.. మహమ్మారి కారణంగా 100 దేశాల్లోనే ప్రజల అభిప్రాయాలను సేకరించింది. మిగతా దేశాల్లో ఇదివరకే చేపట్టిన 'గాలప్ వరల్డ్ పోల్' డేటాను ఆధారం చేసుకుని వాటికి ర్యాంకులు కేటాయించింది.
2019లో తొలి మూడు ర్యాంకుల్లో స్థానం సంపాదించిన నార్వే.. ఇప్పుడు ఎనిమిదో స్థానానికి పడిపోయింది. బ్రిటన్ 18వ ర్యాంకుతో సరి పెట్టుకుంది. జర్బనీ ఏకంగా పది ర్యాంకులు ముందుకొచ్చి ఏడో స్థానంలో నిలిచింది. చైనా అత్యంత 20 సంతోష దేశాల జాబితాలో చోటు సంపాదించింది. గత ఏడాది 94వ స్థానంలో ఉన్న డ్రాగన్ దేశం ఈసారి 19వ స్థానంలోకి దూసుకొచ్చింది. 'అన్నింటికంటే సంతోషంలో వెనుకబడిన దేశాలను కూడా ఐరాస పేర్కొంది. అఫ్గానిస్థాన్, జింబాబ్వే, టాంజానియా, జోర్డాన్లలో నిరుడు అల్ప సంతోషమే మిగిలిందని వ్యాఖ్యానించింది.
ఇదీ చూడండి: ఎట్టకేలకు అతనికి పెళ్లికూతురు దొరికింది
