అమెరికా అధ్యక్ష ఎన్నికలు సమీపిస్తున్న తరుణంలో అధికార రిపబ్లికన్- ప్రతిపక్ష డెమొక్రాటిక్ పార్టీల మధ్య పోరు రసవత్తరంగా మారుతోంది. పై చేయి సాధించడానికి ఇరు పార్టీలు తీవ్రంగా శ్రమిస్తున్నాయి. తాజాగా.. అమెరికా అధ్యక్షుడు డొనాల్డ్ ట్రంప్ విధానాలపై తన బాణాలను ఎక్కుపెట్టింది డెమొక్రాటిక్ పార్టీ. తాము అధికారంలోకి వస్తే గ్రీన్ కార్డుల జారీని పునరుద్ధరిస్తామని హామీనిచ్చింది. ఈ మేరకు ప్రతిపాదిత డెమొక్రాటిక్ పార్టీ ప్లాట్ఫార్మ్-2020లో వెల్లడించింది.
హెచ్-1బీ వీసాలను తాత్కాలికంగా నిలిపివేయాలన్న ట్రంప్ ఆదేశాలను కూడా ఈ ప్లాట్ఫార్మ్ తప్పుబట్టింది. తాము అధికారంలోకి వస్తే నిషేధాన్ని ఉపసంహరించుకుంటామని స్పష్టం చేసింది.
"శాశ్వత, ఉద్యోగం ఆధారంగా ఇమ్మిగ్రేషన్ వీసాలు అందించడానికి మేము మద్దతిస్తాం. మార్కెట్ అవసరాలకు తగ్గట్టుగా ఈ వీసాలను అందివ్వాలి. ప్రతిభను ఆకర్షించి దేశంలో ఉంచుకోవాలని మేము భావిస్తాం. అందుకే శాశ్వత నివాసాల కోసం విదేశీయులకు అందించే గ్రీన్కార్డుపై ట్రంప్ యంత్రాంగం తీసుకున్న నిర్ణయానికి డెమొక్రాట్లు స్వస్తిపలుకుతారు. అదే విధంగా విదేశీ ఉద్యోగలకు ఇచ్చే హెచ్-1బీ వీసాపై ట్రంప్ ప్రభుత్వం విధించిన నిషేధాన్ని కూడా తొలగిస్తాం."
--- 2020 డెమొక్రాటిక్ పార్టీ ప్లాట్ఫార్మ్
ఈ డెమొక్రాటిక్ పార్టీ ప్లాట్ఫార్మ్.. భారత ఎన్నికల్లోని మేనిఫెస్టోతో సమానం. ఆగస్టు 17-20వరకు జరగనున్న సమావేశంలో డెమొక్రాట్లు దీనిని ఆమోదించనున్నారు.
ఇవీ చూడండి:-
