కరోనా బాధితులకు అందిస్తున్న ప్లాస్మా థెరపీని ఇంకా ప్రయోగాత్మక చికిత్సగానే పరిగణిస్తున్నట్టు ప్రపంచ ఆరోగ్య సంస్థ(డబ్ల్యూహెచ్ఓ) వెల్లడించింది. వైరస్పై ఈ చికిత్స పనిచేస్తుందన్న నివేదికలపై అస్పష్టత ఉందని పేర్కొంది. కరోన బారినపడ్డ వారికి ప్లాస్మా చికిత్సను అందించేందుకు అమెరికా అధ్యక్షుడు డొనాల్డ్ ట్రంప్ అత్యవసర అనుమతులిచ్చిన నేపథ్యంలో డబ్ల్యూహెచ్ఓ ప్రకటనకు ప్రాధాన్యం సంతరించుకుంది.
గత శతాబ్దంలో ఈ ప్లాస్మా చికిత్సను అనేక వ్యాధులపై వినియోగించారని.. కానీ దాని ఫలితాలు మిశ్రమంగా ఉన్నట్టు డబ్ల్యూహెచ్ఓ చీఫ్ సైంటిస్ట్ డా. సౌమ్య స్వామినాథన్ వెల్లడించారు. ఈ నేపథ్యంలో ప్లాస్మా థెరపీని ఇంకా ప్రయోగాత్మక చికిత్సగానే పరిగణిస్తున్నట్టు.. దానిపై ఇంకా పరీక్షలు జరగాల్సిన అవసరం ఉందన్నారు.
యాంటీబాడీల స్థాయి ఒక్కొక్కరిలో ఒక్కో రకంగా ఉంటుందని తెలిపారు డబ్ల్యూహెచ్ఓ చీఫ్ సైంటిస్ట్. అందువల్ల రికవరీ అయిన బాధితుల నుంచి ప్లాస్మాను సేకరించాల్సి ఉన్న నేపథ్యంలో ఈ చికిత్సను ప్రామాణీకరించడం కష్టమని అభిప్రాయపడ్డారు.
ఇదీ చూడండి:- పశ్చిమ పసిఫిక్ దేశాల్లో మరో దశకు కరోనా వ్యాప్తి
