కరోనా వైరస్ మూలాలను ఇంకా ఇతమిత్థంగా గుర్తించలేదని ప్రపంచ ఆరోగ్య సంస్థ(డబ్ల్యూహెచ్వో) నిపుణుల బృందం పేర్కొంది. ఈ అంశంపై ఉత్పన్నమైన అనేక ప్రశ్నలకు సమాధానాలను కనుగొనడానికి తదుపరి అధ్యయనాలు అవసరమని తెలిపింది. కరోనా మూలాలను గుర్తించేందుకు ఈ ఏడాది జనవరి 1 నుంచి ఫిబ్రవరి 10 మధ్య చైనాలోని వుహాన్ నగరంలో పర్యటించిన అంతర్జాతీయ బృందం మంగళవారం తన నివేదికను ప్రచురించింది. ఇందులో అంశాలను ప్రస్తావిస్తూ డబ్ల్యూహెచ్వో డైరెక్టర్ జనరల్ టెడ్రోస్ అథనోమ్ ఒక ప్రకటన విడుదల చేశారు.
"డబ్ల్యూహెచ్వోకు సంబంధించినంత వరకూ అన్ని సూత్రీకరణలూ పరిశీలనలో ఉన్నాయి. ఈ నివేదిక చాలా ముఖ్యమైన ప్రారంభం. అయితే ఇది ముగింపు కాదు. వైరస్ మూలాలను మేం ఇంకా గుర్తించలేదు. ఆ దిశగా అన్ని ప్రయత్నాలు కొనసాగుతాయి. వుహాన్లోని వైరాలజీ ల్యాబ్ నుంచి ఈ వైరస్ లీకై ఉండటానికి ఆస్కారం చాలా తక్కువగా ఉందని నిపుణుల బృందం అభిప్రాయపడిందని, అయితే దీని పైనా మరింత పరిశోధన అవసరం ఉంది. కరోనా మూలాలను గుర్తించడానికి ఇంకా సమయం పడుతుంది. ఈ వైరస్ ఎక్కడి నుంచి వచ్చిందన్నది తేలితే మరోసారి ఇలాంటి మహమ్మారులు పునరావృతం కాకుండా ఉమ్మడిగా చర్యలు చేపట్టవచ్చు. అందువల్ల ఒక పరిశోధక బృందం సాగించిన పర్యటనతో అన్ని ప్రశ్నలకు సమాధానం కనుగొనడం కష్టం"
-డబ్ల్యూహెచ్వో డైరెక్టర్ జనరల్ టెడ్రోస్ అథనోమ్
2019 డిసెంబరులోనూ, అంతకుముందూ వెలుగులోకి రాని రీతిలో కరోనా వ్యాప్తి జరిగి ఉంటుందని సూచించే డేటా పై నిపుణులు సమీక్ష జరిపారని టెడ్రోస్ వివరించారు.
ఇదీ చదవండి: కరోనా నుంచి కోలుకున్న పాక్ ప్రధాని
