అమెరికాకు చెందిన ఓ 65 ఏళ్ల వృద్ధుడు వినూత్నంగా క్రిస్మస్ శుభాకాంక్షలు చెప్పాలనుకున్నాడో ఏమో... ఓ బ్యాంకుకు వెళ్లి లూఠీ చేసేశాడు. అదేంటి...? శుభాకాంక్షలకు, బ్యాంకు లూఠీకి సంబంధం ఏంటని అనుకుంటున్నారా? అయితే ఇది చదవండి..
డేవిడ్ వేన్ ఒలివర్ అనే 65 ఏళ్ల వృద్ధుడు క్రిస్మస్ పండుగకు రెండు రోజల ముందు కొలరాడో స్ప్రింగ్స్లోని అకాడెమీ బ్యాంకుకు వెళ్లాడు. సోమవారం మిట్ట మధ్యాహ్నం అందరూ చూస్తుండగానే ఓ మారణాయుధంతో అక్కడి ఉద్యోగులను బెదిరించి బ్యాంకు నుంచి కొంత సొమ్మును లూఠీ చేశాడు. అయితే అది దాచుకోవడానికి అనుకుంటే తప్పులో కాలేసినట్లే.. దొంగిలించిన డబ్బును గాల్లోకి ఎగరేస్తూ.. 'మెర్రీ క్రిస్మస్' అని అరుస్తూ అందరికీ వినూత్నంగా శుభాకాంక్షలు తెలిపాడు ఒలివర్. ఈ తాత చర్యకు అందరూ ఆశ్చర్యపోయారు.
ఆ సొమ్ము బ్యాంకు నుంచి దోపిడీ చేసిందని తెలుసుకున్న స్థానికులు కొంత మొత్తాన్ని బ్యాంకుకు తిరిగి ఇచ్చేశారు. చివరకు స్టార్బక్స్ సమీపంలో ఒలివర్ను పోలీసులు అరెస్టు చేశారు.
ఇదీ చూడండి : 'ఆస్ట్రేలియా ఓపెన్' ప్రైజ్మనీ భారీగా పెరిగిందోచ్
