అణు మహా శక్తులైన రష్యా, అమెరికాల సైన్యాల మధ్య ఇటీవల ఘర్షణ వాతావరణం పెరిగిపోయింది. వారం వ్యవధిలోనే ఈ రెండు దళాలు రెండు సార్లు ముఖాముఖి తలపడ్డాయి. ఈ రెండు సార్లు రష్యా దళాలు దూకుడుగా అమెరికాకు చెందిన వాహనాలు, విమానాలపైకి వెళ్లాయి. వీటిల్లో ఒకసారి నేరుగా రష్యా వాహనాలు అమెరికా సాయుధ వాహనానలను ఢీకొన్నాయి కూడా. ఓ పక్క అమెరికాలో అధ్యక్ష ఎన్నికలు దగ్గర పడుతున్న సమయంలో ఇవి చోటు చేసుకోవడం గమనార్హం.
అసలేం జరిగింది..
ఇటీవల అమెరికాకు చెందిన బీ-52 బాంబర్‌ విమానం ఐరోపాలోని నల్ల సముద్రం వద్ద అంతర్జాతీయ గగనతలంలో ప్రయాణిస్తోంది. అదే సమయంలో రష్యాకు చెందిన యుద్ధవిమానం ఒకటి హఠాత్తుగా అమెరికా విమానానికి 100 అడుగుల దూరంలోకి వచ్చింది. పలు మార్లు బీ52 ముక్కు భాగం పై నుంచి గాల్లోకి ఎగిరింది. ఒక దశలో అమెరికా విమాన పైలట్‌ కొంత ఇబ్బంది పడ్డాడు. ఈ విషయాన్ని ఐరోపాలోని అమెరికా వాయుసేన కమాండర్‌ జెఫ్‌ హార్రిగెయిన్‌ తెలిపారు. గగనతలంలో అనవసరంగా ప్రమాదం జరిగే పరిస్థితి తలెత్తిందని ఆయన అన్నారు. అంతర్జాతీయ విమాన నిబంధనలకు వ్యతిరేకమని అన్నారు. వాస్తవానికి అమెరికా బీ52 బాంబర్‌ విమానం శుక్రవారం నాటో సహచర దేశాల గగనతలాలపై ప్రయాణించి సంఘీభావం వ్యక్తం చేసే కార్యక్రమం నిర్వహిస్తుండగా ఈ ఘటన చోటు చేసుకొంది.
సాయుధ వాహనంతో ఢీకొట్టి..
తూర్పు సిరియాలోని డైరిక్‌ అనే ప్రదేశం వద్ద గత బుధవారం అమెరికా సాయుధ వాహనాలు, రష్యా వాహనాలు ఒకే వరుసలో ప్రయాణిస్తున్నాయి. ఈ క్రమంలో రష్యాకు చెందిన ఓ వాహనం దూకుడుగా వచ్చి అమెరికా సాయుధ వాహనాన్ని పక్క నుంచి ఢీకొంది. అనంతరం రష్యా హెలికాప్టర్లు అమెరికా వాహనాలకు అత్యంత సమీపంలోకి వచ్చాయి. దీనిలో తప్పు ఒకరి పైకి ఒకరు నెట్టుకొనే ప్రయత్నం చేశాయి. ఈ ఘటనలో నలుగురు అమెరికా సైనికులు గాయపడ్డారని ఆ దేశ వర్గాలు వెల్లడించాయి. సిరియాలో అమెరికా, రష్యా దళాలు యుద్ధంలో పాల్గొంటున్నాయి. వీరు వేర్వేరు వర్గాలకు మద్దతునిస్తున్నారు.
ఇదీ చదవండి: ప్రధాని వైదొలగాలంటూ దేశవ్యాప్తంగా నిరసనలు
