అమెరికా ఉపాధ్యక్షురాలు కమలా హారిస్ కాసేపు అధ్యక్ష బాధ్యతలను నిర్వర్తించనున్నారు. జో బైడెన్ శుక్రవారం కోలనోస్కోపీ పరీక్ష చేయించుకునే సమయంలో మత్తుమందు తీసుకుంటారు. ఆ సమయంలో అమెరికా తాత్కాలిక అధ్యక్షురాలిగా కమల వ్యవహరిస్తారు. ఈ మేరకు శ్వేతసౌధం మీడియా కార్యదర్శి జెన్ సాకీ వెల్లడించారు. సాధారణ వైద్య పరీక్షల కోసం బైడెన్ స్థానిక కాలమానం ప్రకారం శుక్రవారం ఉదయం వాషింగ్టన్లోని మెడికల్ సెంటర్కు వెళ్లారు.
2002, 2007లోనూ అప్పటి అమెరికా అధ్యక్షుడు జార్జ్ డబ్ల్యూ బుష్ ఇదే ప్రక్రియను అనుసరించారని సాకీ గుర్తు చేశారు. రాజ్యాంగం ప్రకారం ఇప్పుడు బైడెన్ కూడా కమలకు కాసేపు అధ్యక్ష బాధ్యతలు అప్పగిస్తారని చెప్పారు. ఆ సమయంలో ఆమె ఉపాధ్యక్ష కార్యాలయం నుంచి బాధ్యతలు నిర్వరిస్తారని పేర్కొన్నారు.
78 ఏళ్ల బైడెన్ 2019లో చివరిసారిగా ఈ పరీక్షలు చేయించుకున్నారు. అప్పుడు ఆయన పూర్తి ఆరోగ్యం తో ఉన్నారని, అధ్యక్ష పదవికి అర్హులని వైద్యులు తెలిపారు. బైడెన్ శనివారం 79వ పడిలోకి అడుగుపెడుతున్నారు. ఈ వయస్సులో అమెరికా అధ్యక్ష బాధ్యతలు చేపట్టిన తొలి వ్యక్తి కూడా ఆయనే కావడం విశేషం.
అమెరికా రాజ్యాంగంలోని 25వ సవరణ ప్రకారం, బైడెన్ మత్తుమందు తీసుకునేముందు తాను విధులను నిర్వర్తించలేకపోతున్నానని, హారిస్‌ను తాత్కాలిక అధ్యక్షురాలిని చేస్తూ సెనేట్కు, ప్రతినిధుల సభ స్పీకర్‌కు లేఖ సమరిస్తారు. ఆ తర్వాత విధులు తిరిగి ప్రారంభించే ముందు మరో లేఖ పంపుతారు.
అమెరికా ఉపాధ్యక్షురాలి బాధ్యతలు చేపట్టిన తొలి నల్లజాతీయురాలిగా, దక్షిణాసియా మూలాలున్న వ్యక్తిగా కమల ఇప్పటికే అరుదైన ఘనత సాధించారు. ఇప్పుడు తాత్కాలిక అధ్యక్షురాలి బాధ్యతలు చేపట్టి సరికొత్త చరిత్ర సృష్టించనున్నారు.
ఇదీ చదవండి: అక్కడ 18 ఏళ్లు నిండిన వారందరికీ బూస్టర్ డోసు!
