అమెరికా అధ్యక్ష ఎన్నికల చరిత్రలో ఈ సారి భారీ ఓటింగ్ నమోదైంది. ఇటీవలి కాలంలో ఇదే అత్యధికమయ్యే అవకాశముంది. అయితే, 1876 ఎన్నికల రికార్డుకు కనీసం సమీపానికి కూడా చేరుకోలేదు. ఆ ఏడాది జరిగిన ఎన్నికల్లో 81.8 శాతం మంది తమ ఓటు హక్కు వినియోగించుకోవటం విశేషం.
1876 ఎన్నికల్లో డెమొక్రటిక్ అభ్యర్థి సామ్యూల్ టిల్డెన్ కన్నా తక్కువ ఓట్లు వచ్చినా రిపబ్లికన్ అభ్యర్థి రూథర్ఫర్డ్ హేయస్ గెలుపొందారు. 20 ఎలక్టోరల్ ఓట్లు వివాదం కారణంగా ఎవరికీ మెజారిటీ దక్కలేదు. ఫలితంగా ప్రతినిధుల సభ ఓ కమిషన్ ఏర్పాటు చేసి హేయస్కు అధ్యక్షుడిని చేసింది.
19వ శతాబ్దంలో..
అమెరికాలో 1828 వరకు స్పష్టమైన సమాచారం లేనప్పటికీ 19 శతాబ్దంలో కనీసంగా 70 శాతం పోలింగ్ నమోదయ్యేదని తెలుస్తోంది. అబ్రహం లింకన్ అధ్యక్షుడిగా గెలిచిన 1860 ఎన్నికల్లో 81.2 శాతం ఓటింగ్ నమోదైంది. ఇప్పటివరకు ఇదే రెండో అత్యధికం.
- 1920, 1924 ఎన్నికల్లో వరుసగా 49.2 శాతం, 48.9 శాతానికి ఓటింగ్ పడిపోయింది. మహిళలకు అప్పుడే ఓటుహక్కు లభించటం వల్ల ఓటర్ల సంఖ్య రెట్టింపు అయింది. కానీ ఎక్కువ మంది ఓటు వేయలేదు.
- అప్పటి నుంచి 50-60 శాతం మధ్య ఓటింగ్ నమోదవుతూ వస్తోంది. హుబర్ట్ హంఫ్రేపై రిపబ్లికన్ అభ్యర్థి రిచర్డ్ నిక్సన్ గెలుపొందిన 1968 ఎన్నికల్లో చివరి సారిగా 60 శాతానికి పైగా పోలింగ్ నమోదైంది.
- ఇటీవలి కాలంలో గమనిస్తే 1996 ఎన్నికల్లో అత్యల్ప ఓటింగ్ నమోదైంది. రిపబ్లికన్ బాబ్ డోల్ను బిల్ క్లింటన్ ఓడించిన ఈ ఎన్నికల్లో 49 శాతం మంది తమ ఓటు హక్కు వినియోగించుకున్నారు.
- 2016లో అధ్యక్షుడు డొనాల్డ్ ట్రంప్ గెలిచిన ఎన్నికల్లో 59.2 శాతం మంది ఓట్లేశారు.
ఇదీ చూడండి: ట్రంప్xబైడెన్: రికార్డు ఓటింగ్- హోరాహోరీ ఫలితాలు
