భారత్​కు సహకరించాలని పెంటగాన్​కు ఆదేశాలు

కొవిడ్​పై పోరాటంలో భారత్​కు సహకారం అందించాలని పెంటగాన్​ను అమెరికా రక్షణ మంత్రి లాయిడ్ ఆస్టిన్ ఆదేశించారు. భారత్​లోని ఆరోగ్య కార్యకర్తలకు వైద్య పరికరాలు చేరవేయడంలో పెంటగాన్​ తన వద్ద అన్ని వనరులను వినియోగించాలని సూచించారు.

భారత్​లోని ఆరోగ్య కార్యకర్తలకు వైద్య పరికరాలను అందించాలని పెంటగాన్​(అమెరికా రక్షణ విభాగం)ను ఆదేశించారు అమెరికా రక్షణ మంత్రి లాయిడ్​ ఆస్టిన్. రెండో దశ కరోనా విజృంభణపై పోరాటం చేస్తున్న వారికి సహకారం అందించేందుకు తమ వద్ద ఉన్న అన్ని వనరులను ఉపయోగించాలని పేర్కొన్నారు.

"భారత్​లో కరోనా ఉద్ధృతి పట్ల తీవ్ర ఆందోళన చెందుతున్నాను. భారత్​లో ఫ్రంట్​లైన్ ఆరోగ్య కార్యకర్తలకు వైద్య పరికరాలు అందించడానికి అమెరికా చేస్తున్న కృషికి సహకారంగా మా పరిధిలో, మా వద్ద ఉన్న అన్ని వనరులను ఉపయోగించాలని రక్షణ విభాగాన్ని ఆదేశించాను"

-లాయిడ్​ ఆస్టిన్, అమెరికా రక్షణ మంత్రి

రాబోయే కొద్ది రోజుల్లో ఆక్సిజన్ సంబంధిత పరికరాలు, ర్యాపిడ్ టెస్ట్ కిట్లు, వ్యక్తిగత పరిరక్షణ పరికరాలను భారత్​కు తరలించడంలో రవాణా సదుపాయాలను అందించనున్నట్లు ఆస్టిన్ తెలిపారు. మహమ్మారిపై పోరులో భారత్​కు దన్నుగా నిలవడానికి అమెరికాలోని ఇతర విభాగాలతో సమన్వయం చేసుకొని పనిచేయనున్నట్లు చెప్పారు.

5 టన్నుల ఆక్సిజన్..

అమెరికా నుంచి సాయంలో భాగంగా.. 300కు పైగా ఆక్సిజన్ మిషన్లు న్యూయార్క్​ నుంచి ఆదివారం ఉదయం భారత్​కు బయలుదేరినట్లు అధికారులు వెల్లడించారు. 5 టన్నుల ఈ ఆక్సిజన్​ను ఎయిర్​ఇండియా రవాణా చేస్తోంది. సోమవారం మధ్యాహ్నానికల్లా అవి భారత్​కు చేరుకోనున్నాయి.

ఇదీ చూడండి: 'భారత్​కు సాయం చేసేందుకు కట్టుబడి ఉన్నాం'