అంతర్జాతీయంగా చైనాకు మరో డిజిటల్ దెబ్బ తగిలింది. జాతీయ భద్రత పరిరక్షణలో భాగంగా ఎనిమిది లావాదేవీల యాప్లను నిషేధించే కార్యనిర్వాహక ఉత్తర్వుపై అగ్రరాజ్యాధినేత డొనాల్డ్ ట్రంప్ సంతకం చేశారు. ఇదే తరహాలో గతంలో భారత్.. 200లకు పైగా చైనా యాప్లను నిషేధించడాన్ని ఆయన సమర్ధించారు.
చైనా సృష్టించి, నియంత్రించే ఈ అప్లికేషన్ల వల్ల జాతీయ భద్రతకు ముప్పు వాటిల్లుతుంది. వీటి రూపకల్పనలో బీజింగ్తో పాటు హాంకాంగ్, మకావులకు చెందిన వ్యక్తుల పాత్ర ఉంది. ఈ యాప్ల నుంచి ఎదురయ్యే ముప్పును అధిగమించడానికి దూకుడు చర్యలు తీసుకోవాలి. గత ఆగస్టులో ప్రముఖ వీడియో యాప్ టిక్టాక్, ప్రధాన వీచాట్లను నిషేధించడానికి కారణమిదే.
- డొనాల్డ్ ట్రంప్, అమెరికా అధ్యక్షుడు.
నిషేధించిన యాప్లు..
యాంట్ గ్రూపునకు చెందిన అలీ పేతో సహా కామ్స్కానర్, షేర్ఇట్, టెన్సెంట్ క్యూక్యూ, వీమెట్, వీచాట్ పే, క్యూక్యూ వాలెట్, డబ్ల్యూపీఎస్ ఆఫీస్ వంటివి నిషేధిత జాబితాలో ఉన్నాయి. 'స్మార్ట్‌ఫోన్లు, టాబ్లెట‌్లు, కంప్యూటర‌్లు వంటి వ్యక్తిగత ఎలక్ట్రానిక్ పరికరాలలో ఈ చైనా సాఫ్ట్‌వేర్ యాప్లు ఉంటాయి. అవి వినియోగదారుల నుంచి వ్యక్తిగత సమాచారాన్ని తస్కరించే అవకాశం ఉంది. అందుకే మన జాతీయ భద్రత దృష్ట్యా ఈ చర్యలు తీసుకున్నాం' అని తాజా ఉత్తర్వుల్లో పేర్కొన్నారు.
భారత్ ఇటీవల చైనాకు చెందిన 200లకుపైగా యాప్లను నిషేధించింది. "ఆ అప్లికేషన్లు అనధికారంగా వినియోగదారుల సమాచారాన్ని తస్కరిస్తున్నాయంటూ" భారత ప్రభుత్వం చెప్పిన కారణాన్ని ట్రంప్ సమర్థించారు. అలాగే అమెరికాలోనూ లక్షల మంది వ్యక్తిగత డేటాను డ్రాగన్ యాప్లు సేకరిస్తున్నట్లు అంచనా వేశామని అగ్రనేత పేర్కొన్నారు. ఈ సమాచారం నేరుగా చైనా సైన్యంతో పాటు చైనా కమ్యూనిస్ట్ పార్టీకి చేరుతుందని ఆయన ఆరోపించారు.
ఇదీ చదవండి: రతన్ టాటా కారు నెంబరుతో మహిళ హల్చల్
