మెక్సికో నుంచి వస్తున్న అక్రమ వలసదారులకు అడ్డుకట్ట వేయడానికి అమెరికా అధ్యక్షుడు డొనాల్డ్ ట్రంప్ ఉపయోగించిన అస్త్రం.. 'సరిహద్దు గోడ'. ఈ నిర్ణయం ప్రపంచవ్యాప్తంగా సంచలనం సృష్టించింది. అయినా ఏమాత్రం వెనక్కి తగ్గకుండా... టెక్సాస్లో సరిహద్దు గోడ నిర్మాణం కోసం 275 మిలియన్ డాలర్ల నిధులను కాడెల్ అనే సంస్థకు అందజేసింది అమెరికా ప్రభుత్వం. నిర్మాణ పనులు వచ్చే ఏడాది జనవరిలో ప్రారంభంకానున్నాయి.
అలబామాకు చెందిన కాడెల్ సంస్థ.. 14మైళ్ల(22.5కిలోమీటర్ల) సరిహద్దు గోడ నిర్మాణానికి సంబంధించిన కాంట్రాక్ట్ను దక్కించుకుంది. టెక్సాస్లోని లారెడో ప్రాంతంలో ఈ నిర్మాణం జరగనుంది. ఇక్కడ ఉండే రియో గ్రాండే నది టెక్సాస్, మెక్సికో మధ్య ప్రవహిస్తుంది.
సీబీపీ(అమెరికా కస్టమ్స్ అండ్ బార్డర్ ప్రొటెక్షన్) విభాగం శుక్రవారం రాత్రి ఈ ప్రకటన విడుదల చేసింది. కాంగ్రెస్ నుంచి అందిన నిధులను ఈ గోడ నిర్మాణం కోసం వినియోగిస్తున్నట్టు పేర్కొంది. ప్రణాళికాపరంగా అయితే ఈ గొడ నిర్మాణంలో కొంతమేర ప్రైవేటు స్థలాలనూ తీసుకోవాల్సి వస్తుంది. ఈ మేరకు ఇప్పటికే ప్రభుత్వం తరపు న్యాయవాదులు ఓ ఫెడరల్ కోర్టును సంప్రదించగా... నిర్మాణం కోసం స్థలాలను జప్తు చేయడానికి అనుమతినిచ్చింది న్యాయస్థానం.
ట్రంప్ అధికారంలోకి వచ్చినప్పటి నుంచి 162 మైళ్ల సరిహద్దు వెంబడి గోడ నిర్మాణం జరిగింది. ఇంకా 500 మైళ్ల నిర్మాణం జరగాల్సి ఉంది. ఈ ఏడాది చివర్లో నిర్మాణం పూర్తవుతుందని గతంలో ట్రంప్ హామీనిచ్చారు.
