నిరంతరం బాంబుల మోతలతో అట్టుడికే సిరియా, సుడాన్ వంటి దేశాల్లో కరోనా టీకా పంపిణీ కోసం ఏకగ్రీవంగా తీర్మానం ఆమోదించింది ఐక్యరాజ్య సమితి భద్రతా మండలి(యూఎన్ఎస్సీ). ఘర్షణ ప్రాంతాల్లోని లక్షలాది మందికి వ్యాక్సిన్ అందించేందుకు మానవతా దృక్పథంతో ఆయా దేశాలు సాయుధ పోరాటాలకు విరామం ఇవ్వాలని డిమాండ్ చేసింది.
ఈ తీర్మానానికి 112 దేశాలు మద్దతు పలికాయి. సిరియా, యెమెన్ నుంచి సెంట్రల్ ఆప్రికా రిపబ్లిక్, మాలి, సుడాన్, సోమాలియా వరకు ప్రధాన సంఘర్షణ ప్రాంతాల్లో యుద్ధాలకు తక్షణం విరామం ఇవ్వాలని గత ఏడాది జులై 1న యూఎన్ఏసీ కౌన్సిల్ చేసిన డిమాండ్ను పునరుద్ఘాటించాయి సభ్య దేశాలు. కరోనా మహమ్మారిని కట్టడి చేసేందుకు అన్ని ఘర్షణ ప్రాంతాల్లో కాల్పుల విరమణ చేపట్టాలని కోరినట్లు గుర్తు చేశాయి. ఇదే విషయాన్ని 2020, మార్చి 23న ఐరాస ప్రధాన కార్యదర్శి ఆంటోనియో గుటెరస్ కూడా కోరారు.
వర్చువల్గా జరిగిన ఈ సమేవశంలో తీర్మానానికి ఈమెయిల్ ద్వారా వచ్చిన ఓట్లను ప్రకటించారు బ్రిటన్ ఐరాస రాయబారి, ప్రస్తుత కౌన్సిల్ అధ్యక్షురాలు.. బార్బరా వూడ్వర్డ్. ఈ సందర్భంగా కీలక వ్యాఖ్యలు చేశారు.
"ఈ తీర్మానం సంఘర్షణ ప్రాంతాల్లోని 160 మిలియన్ల మందికి వ్యాక్సిన్ అందేందుకు దోహదపడుతుంది. మరోవైపు.. ఘర్షణలను దూరం చేస్తుంది. ఇది తొలి అడుగు. దీనికి అంతర్జాతీయంగా మరింత చొరవ అవసరం. ప్రస్తుత పరిస్థితుల్లో దేశాలతో పాటు స్థానిక స్థాయిల్లో మరిన్ని చర్చలు జరగాలి. "
- బార్బరా వూడ్వర్డ్, యూఎన్ఎస్సీ అధ్యక్షురాలు
సాయుధ పోరాటాలు కొవిడ్-19 మహమ్మారి ప్రభావాన్ని పెంచుతాయని, మరోవైపు.. సాయుధ పోరాటాలతో ఎదురయ్యే ప్రతికూల ప్రభావాన్ని, అసమానతలను కరోనా పెంచుతుందని సభ్య దేశాలు పేర్కొన్నాయి. వైరస్ను అంతమొందించేందుకు అన్ని దేశాలకు సమానంగా వ్యాక్సిన్ అందించాల్సిన అవసరం ఉందని గుర్తు చేశాయి. పేద, మధ్య ఆదాయ దేశాలకు ధనిక దేశాలు వ్యాక్సిన్లను విరాళంగా అందించాలని పిలుపునిచ్చాయి. ప్రపంచ ఆరోగ్య సంస్థ ఏర్పాటు చేసిన కొవాక్స్ ద్వారా లేదా ఏ ఇతర మార్గంలోనైనా సాయం చేయాలని కోరాయి.
ఇదీ చూడండి: యూఎన్‌ఎస్‌సీలో భారత్ శాశ్వత సభ్యత్వానికి చైనా మోకాలడ్డు!
