బ్రెజిల్ను కరోనా వైరస్ కలవరపెడుతోంది. తాజాగా దేశంలోని రెండు రాష్ట్రాల గవర్నర్లకు వైరస్ సోకింది. వీరిద్దరూ గతంలో కరోనాపై పోరులో అధ్యక్షుడు బొల్సొనారో తీరును ప్రశ్నించినవారే.
రియో డి జెనిరో గవర్నర్ విల్సన్ విట్జెల్, ఉత్తర పారా రాష్ట్ర గవర్నర్ హెల్డర్ బార్బల్హో.. కరోనా పరీక్షల్లో పాజిటివ్గా తేలినట్టు ట్వీట్స్ చేశారు. ఈ వైరస్ ప్రాణాంతకమని.. ప్రజలు ఇళ్ల వద్దే ఉండాలని విజ్ఞప్తి చేశారు.
శుక్రవారం నుంచే తనకు గొంతునొప్పి, జ్వరం వంటి వైరస్ లక్షణాలున్నట్టు పేర్కొన్న విల్సన్.. ఇప్పుడు పరిస్థితి కొంత మెరుగుపడిందన్నారు. వైద్యుల సలహాలు తీసుకుని విధులు నిర్వర్తిస్తానని 52ఏళ్ల రియో డి జెనిరో గవర్నర్ స్పష్టం చేశారు.
అధ్యక్షుడి తీరుపై...
ప్రపంచాన్ని గడగడలాడిస్తున్న కరోనా మహమ్మారిని బ్రెజిల్ అధ్యక్షుడు చిన్నపాటి ఫ్లూతో పోల్చారు. ఇంత దానికి భౌతిక దూరం పాటించాల్సిన అవసరం లేదన్నారు. దేశ ఆర్థిక వ్యవస్థను ఇలాంటి చర్యలు నాశనం చేస్తాయని అభిప్రాయపడ్డారు. దీనిపై విల్సన్, హెల్డర్ మండిపడ్డారు.
కరోనా వైరస్తో లాటిన్ అమెరికా దేశాల్లో బ్రెజిల్ అత్యంత దారుణంగా దెబ్బతింది. ఈ ఒక్క దేశంలో ఇప్పటివరకు 1,552 మరణాలు సంభవించాయి. మొత్తం 25వేల 684మందికి వైరస్ సోకింది.
ఇదీ చూడండి:- కార్చిచ్చులా కరోనా వ్యాప్తి- 20 లక్షలు దాటిన కేసులు
