అమెరికా అధ్యక్షుడు డొనాల్ట్ ట్రంప్ వ్యక్తిగత ఖాతా నుంచి విమర్శకులను బ్లాక్ చేసేందుకు అనుమతివ్వాలని సుప్రీంకోర్టును కోరనున్నట్లు తెలిపింది ఆయన పరిపాలనా విభాగం. ట్విట్టర్ ఖాతాలో ఉండే అన్ని ఆప్షన్స్ ను వినియోగించుకునే స్వేచ్ఛ.. ట్రంప్కు ఉందని, అధికారిక కార్యాలయానికి దీనితో సంబంధం లేదని వివరిస్తూ ఓ తీర్పును సమీక్షించాలని హైకోర్టులో విజ్ఞప్తి చేశారు ట్రంప్ తరఫు న్యాయవాది.
ట్రంప్ ట్విట్టర్ ఖాతాలో ప్రభుత్వానికి సంబంధించిన అధికారిక ప్రకటనలు, పరీశీలనలు వెల్లడిస్తున్నారని.. అందువల్ల విమర్శకులను బ్లాక్ చేయడానికి వీల్లేదని న్యూయార్క్లోని న్యాయస్థానం గతేడాది తీర్పునిచ్చింది. ప్రభుత్వ విధానాలను వ్యతిరేకిస్తున్న విమర్శకుల అభిప్రాయాలతో విభేదించి, వారిని బ్లాక్ చేయడం రాజ్యాంగ నిబంధనలను ఉల్లంఘించడమేనని పేర్కొంది.
తీర్పును సమీక్షించాలనే ట్రంప్ వినతిని అంగీకరించవద్దని అయన ట్విట్టర్ ఖాతాలో బ్లాక్కు గురైన ఏడుగురు విమర్శకులు కోర్టును కోరారు. వీరి తరఫున కొలంబియా యూనివర్సిటీకి చెందిన నైట్ ఫస్ట్ అమెండ్మెంట్ ఇనిస్టిట్యూట్ పిటిషన్ దాఖలు చేసింది. ప్రజాభిప్రాయాలను అధికారిక ఖాతాల ద్వారా ప్రభుత్వ దృష్టికి తీసుకెళ్లే విమర్శకులను బ్లాక్ చేయడం రాజ్యాంగ ప్రాథమిక సూత్రాన్ని విస్మరించడమేనని పేర్కొంది.
సుప్రీంకే అధికారం..
అయితే అధ్యక్షుడి వ్యక్తిగత నిర్ణయాలు, ప్రవర్తనపై నిర్ణయం తీసుకునే అధికారం దిగువ కోర్టులకు లేదని, సుప్రీంకోర్టు మాత్రమే తుది నిర్ణయం తీసుకోవాల్సి ఉంటుందని ట్రంప్ తరఫు న్యాయవాది కోర్టుకు తెలిపారు.
నవంబరులో జరిగే అధ్యక్ష ఎన్నికల వరకు ట్రంప్ వినతిపై కోర్టు విచారణ చేపట్టే అవకాశాలు కన్పించడం లేదు. కరోనా కారణంగా విచారణ ఆలస్యమవుతోంది.
