అమెరికా-చైనా మధ్య 15 నెలలుగా నెలకొన్న వాణిజ్యం యుద్ధం ప్రభావం యావత్ ప్రపంచంపై పడింది. సమస్య పరిష్కారానికి ఇరు దేశాలు ఇప్పటివరకు ఎన్నో చర్చలు జరిపాయి. కానీ ఫలితం దక్కలేదు. ఈ నేపథ్యంలో అమెరికా అధ్యక్షుడు డొనాల్డ్ ట్రంప్ ఓ కీలక నిర్ణయం తీసుకున్నారు. చైనాతో జరుగుతున్న చర్చల్లో భాగంగా ఆ దేశ వైస్ ప్రీమియర్ లియూ హీతో శుక్రవారం సమావేశం కానున్నట్టు ప్రకటించారు.
అమెరికా-చైనా మధ్య గురువారం పునఃప్రారంభమైన ఉన్నత స్థాయి వాణిజ్య చర్చల్లో చైనా బృందానికి లియూ నేతృత్వం వహిస్తున్నారు. ఇందులో భాగంగానే ట్రంప్ లీయూల భేటీ ఉండనుంది.
"ఉపాధ్యక్షుడు లియూతో శుక్రవారం నేను శ్వేతసౌధంలో సమావేశం కానున్నాను." - డొనాల్డ్ ట్రంప్, అమెరికా అధ్యక్షుడు
ట్రంప్ ప్రకటనతో స్టాక్ మార్కెట్లలో ఒక్కసారిగా కొనుగోళ్లు ఉపందుకున్నాయి.
ఈ ప్రకటనకు ముందు చైనాపై పలు కీలక వ్యాఖ్యలు చేశారు ట్రంప్. చైనా ఆర్థిక వ్యవస్థ.. గత పదేళ్లలో ఎన్నడూ లేనంతగా అనిశ్చితిని ఎదుర్కొంటోందని అభిప్రాయపడ్డారు. ఈ కారణంగా అమెరికాతో వాణిజ్య ఒప్పందం కుదుర్చుకోవాలని డ్రాగన్ దేశం ఆశిస్తున్నట్టు పేర్కొన్నారు.
ఈ ఏడాది ట్రంప్- లియూ మధ్య ఇప్పటికే రెండుసార్లు చర్చలు జరిగాయి. వీరి సంప్రదింపుల తర్వాత ఇరు దేశాల మధ్య వాణిజ్య యుద్ధం కొంతమేర తగ్గింది.
ఇదీ చూడండి: ఐరాస భద్రతా మండలి వేదికగా 'కశ్మీర్'పై డ్రాగన్ గురి!
