కరోనా వ్యాక్సిన్ తొలుత అమెరికన్లకు లభించే విధంగా ఎగ్జిక్యూటివ్ ఆర్డర్లపై సంతకం చేశారు ఆ దేశాధ్యక్షుడు డొనాల్డ్ ట్రంప్. ఇతర దేశాలకు టీకాలు అందించే ముందు తమ దేశానికే ప్రాధాన్యతనిచ్చేందుకు ఈ చర్యలు చేపట్టారు.
అగ్రరాజ్య ప్రజలకే తొలుత వ్యాక్సిన్ అందించే విషయంలో.. అవసరమైతే డిఫెన్స్ ప్రొడక్షన్ యాక్ట్(డీపీఏ)నూ అమలు చేసేందుకు సిద్ధంగా ఉన్నట్టు వెల్లడించారు ట్రంప్. ప్రభుత్వ ఆర్డర్లకే తొలి ప్రాధాన్యతనిచ్చే విధంగా ప్రైవేటు సంస్థలపై డీపీఏ ఒత్తిడి పెంచుతుంది.
సురక్షితమైన, సమర్థవంతమైన తొలి కరోనా వ్యాక్సిన్ను అగ్రరాజ్య కంపెనీలే రూపొందించాయని హర్షం వ్యక్తం చేశారు ట్రంప్. కరోనాపై త్వరలోనే విజయం సాధిస్తామని.. శ్వేతసౌధంలో జరిగిన 'ఆపరేషన్ వార్ప్ స్పీడ్' కార్యక్రమం సందర్భంగా వ్యాఖ్యానించారు.
"మేము త్వరలోనే కరోనా మహమ్మారిని అంతం చేస్తాం. దీంతో అమెరికా సహా.. ప్రపంచవ్యాప్తంగా లక్షలాది మంది ప్రాణాలను రక్షిస్తాం. అందుకోసం మా పాలనా యంత్రాంగంలోనే.. మొదటగా సురక్షితమైన, సమర్థవంతరమైన వ్యాక్సిన్ ఉత్పత్తిని చేశాం."
- డొనాల్డ్ ట్రంప్, అమెరికా అధ్యక్షుడు.
అమెరికా.. ఫైజర్, మోడెర్నా వ్యాక్సిన్లను అభివృద్ధి చేస్తోంది. అయితే టీకా ఉత్పత్తి, సరఫరా కోసం ఆ దేశం ఇప్పటివరకు 14బిలియన్ డాలర్లు వెచ్చించినట్టు తెలుస్తోంది. ఈ టీకాలు 95శాతం సమర్థతను చాటుకున్నాయని ట్రంప్ పేర్కొన్నారు.
'నేనే అధ్యక్షుడిని..'
అగ్రరాజ్య అధ్యక్షుడిగా మరోమారు తానే కొనసాగుతానని విశ్వాసం వ్యక్తం చేశారు ట్రంప్. మరికొన్ని రోజుల్లో అధ్యక్ష ఎన్నికల ఫలితాలను అధికారికంగా ధ్రువీకరించనున్న తరుణంలో ట్రంప్ ఈ వ్యాఖ్యలు చేయడం సర్వత్రా చర్చనీయాంశమైంది.
నవంబర్ 3న జరిగిన ఎన్నికల్లో రిపబ్లికన్ అభ్యర్థి డొనాల్డ్ ట్రంప్పై.. డెమొక్రాట్ అభ్యర్థి జో బైడెన్ విజయం సాధించారు. అయినప్పటికీ ఓటమిని అంగీకరించని ట్రంప్.. ఎన్నికల్లో మోసం జరిగిందంటూ న్యాయపోరాటానికి దిగారు. పలు కోర్టుల్లో వ్యాజ్యం వేయగా.. ఆయా న్యాయస్థానాలు ఆయన పిటిషన్లను తిరస్కరించాయి.
ఇదీ చదవండి: అమెరికా నుంచి ఆయుధ కొనుగోళ్లను భారీగా పెంచిన భారత్
