అఫ్గానిస్థాన్లో తాలిబాన్ల ఆక్రమణల జోరు కొనసాగుతోంది. దాదాపు 85 శాతం భూభాగాన్ని హస్తగతం చేసుకున్నట్లు ఇటీవలే తాలిబాన్ ప్రతినిధులు పేర్కొన్నారు. ఈ నేపథ్యంలో పలు వ్యాఖ్యలు చేసింది అమెరికా రక్షణ రంగ విభాగం పెంటగాన్. అఫ్గాన్ ప్రభుత్వం వల్లే ఇలా జరుగుతోందని, ఇందులో సైన్యం తప్పేమీలేదని ఆరోపించింది.
"తాలిబాన్ల దురాక్రమణలను నిశితంగా పరిశీలిస్తున్నాం. అఫ్గాన్లో భద్రత క్రమంగా లోపిస్తోంది. దాడులు పెరుగుతున్నాయి. ఈ నేపథ్యంలో అఫ్గాన్ పాలకులతో పనిచేసేందుకు సిద్ధంగా ఉన్నట్లు తెలిపాం. వారు తమ సామర్థ్యాన్ని ఉపయోగించుకుని పరిస్థితులను అదుపులోకి తీసుకురాగలరని నమ్ముతున్నాం. అఫ్గాన్ ప్రభుత్వం తమ ప్రజల కోసం పోరాడే సమయం ఆసన్నమైంది."
--జాన్ కిర్బీ, పెంటగాన్ సమాచార ప్రతినిధి.
అమెరికా, నాటో దేశాలు బలగాల ఉపసంహరణ ప్రక్రియను దాదాపుగా పూర్తి చేసిన నేపథ్యంలో.. గత కొన్ని రోజులుగా అఫ్గాన్ బలగాలకు, తాలిబాన్లకు మధ్య భీకర యుద్ధం జరుగుతోంది. తాలిబన్‌ ఉగ్రవాదులతో తలపడలేక ఇప్పటివరకు అనేక మంది అఫ్గాన్ సైనికులు పొరుగు దేశాలకు పారిపోయారు.
అయితే.. ఆగస్టు 31 కల్లా అఫ్గాన్ నుంచి తమ సైన్యాన్ని పూర్తిగా ఉపసంహరించనున్నట్లు బైడెన్ ఇటీవలే ప్రకటించడం గమనార్హం.
ఇదీ చదవండి:తాలిబన్ల ఏరివేత.. 109 మంది హతం
