అమెరికాకు చెందిన ప్రైవేటు అంతరిక్ష సంస్థ స్పేస్ఎక్స్.. నాసాతో కలిసి చేపట్టనున్న అంతరిక్ష యాత్ర బుధవారానికి వాయిదా పడింది. వందలాది మైళ్ల మేర భారీ ఈదురు గాలులు, ప్రతికూల వాతావరణం నెలకొన్న దృష్ట్యా ఈ నిర్ణయం తీసుకుంది.
షెడ్యూల్ ప్రకారం.. అంతర్జాతీయ అంతరిక్ష పరిశోధన కేంద్రంలో ఆరు నెలల మిషన్లో భాగంగా.. ఆదివారం ఉదయం నలుగురు వ్యోమగాములతో ఈ యాత్ర ప్రారంభం కావాల్సి ఉంది. అయితే.. నాసా కెన్నెడీ స్పేస్ సెంటర్‌లో వాతావరణం ప్రశాంతంగానే ఉన్నప్పటికీ... ఈశాన్య తీరంలో భారీ తుపాను బీభత్సం కొనసాగుతోంది. ఈ నేపథ్యంలో మిషన్ను వాయిదా వేస్తున్నట్లు శనివారం అధికారులు తెలిపారు.
బుధవారం వరకు వాతావరణం ప్రశాంతంగా మారుతుందని అధికారులు అంచనా వేస్తున్నారు. అప్పటివరకు ఈ యాత్ర చేపట్టనున్న ఒక జర్మన్, ముగ్గురు అమెరికన్ వ్యోమగాములు.. కెన్నెడీ స్పేస్ సెంటర్లోనే ఉండనున్నారు. ఇది.. ఏడాదిన్నర వ్యవధిలో నాసాతో కలిసి స్పేస్ఎక్స్ చేపట్టనున్న నాలుగో అంతరిక్ష యాత్ర కావడం గమనార్హం. కాగా.. ఇది స్పేస్ఎక్స్ ఐదో ప్యాసెంజర్ ఫ్లైట్. గతనెలలో స్పేస్ఎక్స్ తన మొదటి ప్రైవేట్ విమానాన్ని అంతరిక్షంలోకి పంపింది.
ఇదీ చూడండి: స్పేస్ఎక్స్ తొలి ప్రైవేటు స్పేస్ టూర్ విజయవంతం
