అమెరికాలో పోలీసు అమానుష ప్రవర్తనతో ప్రాణాలు కోల్పోయిన ఆఫ్రికన్ అమెరికన్ జార్జి ఫ్లాయిడ్ అంత్యక్రియలు పూర్తయ్యాయి. హ్యూస్టన్కు సమీపంలోని పియరల్ శ్మశానవాటికలో ఫ్లాయిడ్కు క్రైస్తవ బోధకుడు షార్ప్టన్ అంతిమ సంస్కారాలు నిర్వహించారు. ఈ కార్యక్రమం వేదికగా ఫ్లాయిడ్.. ప్రజలందరికీ గుర్తుండిపోతారని ఆయన కుటుంబ సభ్యులు ఉద్ఘాటించారు.
ఆరు రోజులపాటు ఫ్లాయిడ్ సంతాప దినాలు నిర్వహించారు. తరువాత ఫ్లాయిడ్ పుట్టిన నార్త్ కరోలినాలోని రేఫోర్డ్, పెరిగిన హ్యూస్టన్, మరణించిన మిన్నియాపొలిస్ నగరాల్లో ఆయన పార్థివ దేహాన్ని ప్రజల సందర్శనార్థం ఉంచారు. వేలాది మంది తరలివచ్చి ఫ్లాయిడ్కు నివాళులు అర్పించారు. ప్రముఖ నటులు జామీ ఫాక్స్, చాన్నింగ్ టాటమ్, రాపర్ ట్రే థా ట్రూత్; రిపబ్లిక్ షీలా జాక్సన్ లీ, హ్యూస్టన్ పోలీస్ చీఫ్ ఆర్ట్ అసేవెడో, హ్యూస్టన్ మేయర్ సిల్వెస్టర్ టర్నర్, గ్రామీ విజేత నే యో కూడా ఉన్నారు.
ఫ్లాయిడ్ మృతికి న్యాయం జరగాలి: బిడెన్
జాతి వివక్ష సమసిపోవాలని ఆకాంక్షించారు అమెరికా అధ్యక్ష ఎన్నికల అభ్యర్థిత్వానికి పోటీ పడుతున్న జో బిడెన్. ఫ్లాయిడ్ అంత్యక్రియల సందర్భంగా వీడియో సందేశం విడుదల చేశారు. ఫ్లాయిడ్కు న్యాయం జరిగితే.. జాతి వివక్షకు వ్యతిరేకంగా అమెరికా ముందుకు సాగుతున్నట్లేనని పేర్కొన్నారు.
ఫ్రాన్స్లో సంఘీభావం..
ఫ్రాన్స్ రాజధాని పారిస్లో ఫ్లాయిడ్ మృతికి సంఘీభావం తెలిపారు నల్లజాతీయులు. 8 నిమిషాల 45 సెకన్లపాటు మౌనం పాటించారు. జాతి వివక్షకు వ్యతిరేకంగా నినాదాలు చేశారు.
ఇటలీలో ప్రదర్శన
ఫ్లాయిడ్ అంత్యక్రియల సందర్భంగా ఇటలీలో ప్రత్యేక ప్రార్థనలు చేశారు. కొవ్వొత్తులతో ప్రదర్శన చేశారు. ప్లాయిడ్ మృతికి న్యాయం జరగాలన్న నినాదంతో మాస్కులు ధరించి నిరసన చేపట్టారు.
బానిసల వ్యాపారి విగ్రహం తొలగింపు..
బ్రిటన్ రాజధాని లండన్లో ఓ బానిసల వ్యాపారి విగ్రహాన్ని తొలగించారు స్థానికులు. గత కొద్దిరోజులుగా జరుగుతున్న నిరసనల్లో పలు విగ్రహాలు ధ్వంసమయ్యాయి. ఇదే కోవలో లండన్లోని బానిసల వ్యాపారి విగ్రహాన్ని తొలగించారు నిరసనకారులు. జాతి వివక్షకు వ్యతిరేకంగా నినాదాలు చేశారు. ఆక్స్ఫర్డ్ విశ్వవిద్యాలయం ఎదుట కూడా నిరసనలు చేశారు ఆందోళనకారులు. జాతివివక్ష సమసిపోవాలని పేర్కొంటూ ర్యాలీ తీశారు.
ఇదీ చూడండి: వివాదాస్పద మ్యాపుపై నేపాల్ పార్లమెంటులో చర్చ
