కరోనా వైరస్.. మూడు నెలలుగా ప్రపంచంలో అల్లకల్లోలం సృష్టిస్తున్న మహమ్మారి. చైనా నుంచి ఇటలీ, ఫ్రాన్స్, స్పెయిన్, అమెరికా అంటూ.. దాదాపు అన్ని ఖండాలను బెంబెలెత్తిస్తోంది ఈ వైరస్. లాక్డౌన్, కర్ఫ్యూ అని తమ వద్ద ఉన్న అన్ని అస్త్రాలనూ ఉపయోగించేశాయి ప్రపంచ దేశాలు. అయినప్పటికీ.. ఐరోపా, అమెరికాలో నిన్న మొన్నటి వరకు రికార్డు స్థాయిలో కేసులు, మరణాలు నమోదయ్యాయి.
ఇంత కల్లోలంలో ఒక్కసారిగా ఆశలు చిగురించాయ్. మానవాళి ఈ ప్రమాదం నుంచి గట్టెక్కగలదన్న విశ్వాసం పెరిగింది. ఇందుకు కారణం ఐరోపా, అమెరికాల్లో రోజువారీ మృతుల సంఖ్య కొంతమేర తగ్గడం. మునుపటితో పోల్చితే పాజిటివ్ కేసులూ కాస్త తగ్గాయి.
స్పెయిన్లో మృతుల సంఖ్య 15వేలు దాటింది. అయితే బుధవారం 757 మంది మరణించగా.. గురువారం ఆ సంఖ్య 683కు తగ్గింది. దీనిపై ఆ దేశ ప్రధాని పెడ్రో సాంచెజ్ స్పందించారు.
"వైరస్ నియంత్రణలోకి వస్తోంది. అయినప్పటికీ జాగ్రత్తగా ఉండాలి. ఈ విషయంలో వెనక్కి తిరగకపోవడమే ముఖ్యం. పరిస్థితి తిరిగి మొదటికి రాకూడదు."
--- పెడ్రో సాంచెజ్, స్పెయిన్ ప్రధాని.
బ్రిటన్లో...
బ్రిటన్లో అత్యంత సానుకూల విషయం.. ఆ దేశ ప్రధాని బోరిస్ జాన్సన్ ఆరోగ్యం కుదుటపడటం. మూడు రోజుల పాటు ఐసీయూలో చికిత్స అనంతరం ప్రధానిని సాధారణ వార్డుకు మార్చారు. ఈ వార్త ప్రపంచవ్యాప్తంగా 15లక్షల మందికిపైగా బాధితుల్లో స్ఫూర్తి నింపుతోంది.
అమెరికాలో 24 గంటల వ్యవధిలో 1900మంది ప్రాణాలు కోల్పోయారు. అయితే బుధవారంతో పోల్చితే ఇది కొంత తక్కువే. ఈ నేపథ్యంలో.. అమెరికా సరైన మార్గంలో పయనిస్తున్నట్టు అగ్రరాజ్యం ఉన్నతాధికారి ఆంటోని ఫౌచీ పేర్కొన్నారు.
అమెరికాలో వైరస్ కేంద్రబిందువైన న్యూయార్క్లోనూ పరిస్థితులు కొంతమేర మెరుగుపడ్డాయి. తాజాగా 799మంది మరణించినప్పటికీ.. ఆసుపత్రుల్లో చేరుతున్న వారి సంఖ్య తొలిసారిగా తగ్గింది. దీంతో తమ చర్యలు ఫలించాయని ఆ రాష్ట్ర గవర్నర్ ఆండ్రూ కౌమో తెలిపారు. ఇదే కొనసాగాలని ఆకాంక్షించారు.
ఇదీ చూడండి:- 'బయో ఉగ్రదాడికి ట్రైలర్ ఈ కరోనా సంక్షోభం'
