ఆరాంకో చమురు క్షేత్రాలపై జరిగిన డ్రోన్ దాడులు నిస్సందేహంగా ఇరాన్ చేయించినవే అని సౌదీ ఆరేబియా ఆరోపించింది. ఇరాన్లోని ఉత్తర భాగం నుంచి ఈ దాడులు జరిగాయని, అయితే కచ్చితంగా ఏ ప్రాంతం నుంచి చేశారో ఇంకా తెలియలేదని పేర్కొంది. దాడులకు ఉపయోగించిన 18 డ్రోన్లు, ఏడు క్రూయిజ్ క్షిపణుల శకలాలను ఈ సందర్భంగా ప్రదర్శించింది.
అపరాధి ఎవరు?
ఈ దాడుల వెనుక ఉన్న అపరాధి ఇరానా? కాదా? అనే విషయంలో సౌదీ స్పష్టతనీయలేదు. అయితే దాడులు ఎవరు చేశారనే విషయంపై ఐరాస దౌత్యవేత్తలు విచారణ చేయనున్నారు.
50 శాతం వరకు నష్టం
ఈ దాడుల ఫలితంగా తమ చమురు ఉత్పత్తిలో 50 శాతం వరకు నష్టపోయామని స్పష్టం చేసింది సౌదీ. ఇది రికార్డు స్థాయిలో చమురు ధరల పెరుగుదలకు కారణమైందని పేర్కొంది. ఇది చమురు రంగ దుర్భలత్వాన్ని ఎత్తిచూపుతోందని నిపుణులు అభిప్రాయపడుతున్నారు.
సైనిక దాడులకు తోడుగా..
ఇరాన్పై సైనిక దాడులు చేయాలా లేదా అన్న విషయంలో తమకు అనేక అవకాశాలు ఉన్నాయని అమెరికా అధ్యక్షుడు ట్రంప్ పేర్కొన్నారు. అంతిమ ఎంపిక యుద్ధమే కావొచ్చని ఆయన వ్యాఖ్యానించారు. ఇరాన్పై కొత్తగా విధించిన ఆంక్షలు 48 గంటల్లో అమలులోకి వస్తాయని స్పష్టం చేశారు.
యుద్ధానికి కాలుదువ్వడమే..
సౌదీ చమురు క్షేత్రాలపై దాడులు చేయడమంటే యుద్ధానికి కాలుదువ్వడమేనని అమెరికా విదేశాంగ మంత్రి మైక్ పాంపియో వ్యాఖ్యానించారు. దాడుల వెనుక ఉన్నది ఇరానే అని ఆయన పునరుద్ఘాటించారు.
ఇదీ చూడండి: అమెజాన్: ఇకపై హిందీలోనూ 'అలెక్సా' సేవలు
