ప్రపంచ వ్యాప్తంగా పెరుగుతోన్న ద్రవ్యోల్బణంతో వస్తువుల ధరలు ఆకాశాన్ని అంటుతున్నాయి. దక్షిణ అమెరికా దేశం.. అర్జెంటీనాను ఈ సమస్య వేధిస్తోంది. ద్రవ్యోల్బణాన్ని తప్పించుకుని లావాదేవీలు చేస్తూ తమకు కావల్సిన వస్తువులను కొనుగోలు చేస్తున్నారు. వీరు ఉపయోగించే విధానం ఏంటో తెలుసా... పూర్వీకులు అనుసరించిన వస్తుమార్పిడి పద్ధతే.
అర్జెంటీనా రాజధాని బ్యూనస్ ఎయిర్స్ శివారు పట్టణం మెర్లో. ఈ పట్టణ నివాసితులు వారాంతాల్లో ఒక చోట సమావేశమవుతారు. వారికి కావలసిన వస్తువులను తీసుకొని, ఇతరులకు కావలసినవి ఇస్తుంటారు. సామాజిక మాధ్యమాలలో ముందుగానే ఒప్పందాలు చేసుకుని ఇలా ఒక ప్రత్యేక స్థలంలో వస్తుమార్పిడి చేసుకుంటారు.
"ప్రజల నిత్యవసరాల కొనుగోలుకు ఈ మార్కెట్ వేదికైంది. ఇంతకుముందు వివిధ రకాల వస్తువుల వ్యాపారం జరిగేది. ప్రస్తుతం ఆహార పదార్థాల మార్పిడే జరుగుతోంది. ఒక వైపు ధరలు పెరిగాయి. ఎంత శాతం పెరిగాయనేది నేను కచ్చితంగా చెప్పలేను కానీ గత సంవత్సరం కంటే ఇప్పుడు ఎక్కువే ఉన్నాయి."
-లాలు, వస్తుమార్పిడి మార్కెట్ నిర్వాహకురాలు
ఈ మార్కెట్ని స్థాపించి నాలుగేళ్ల పైనే అవుతోంది. మొదట్లో బట్టలు, బొమ్మలు లాంటి వస్తుమార్పిడే నిర్వహించేవారు. ప్రస్తుతం ఆహారం, నిత్యావసర వస్తువుల లావాదేవీలన్నీ ఇచ్చిపుచ్చుకునే విధానంలో భాగమైపోయాయి.
ఉద్యోగం కోల్పోయి బతకడం కష్టంగా మారిన ఆండ్రియానా అనే మహిళకు వస్తుమార్పిడి మార్కెట్ దారి చూపింది. నలుగురు పిల్లల తల్లి అయిన ఆండ్రియానా ఈ ఏడాది మొదట్లో ఉద్యోగం కోల్పోయింది. ఇంట్లో రోజులు గడవడం కష్టమైపోయాయి. పిల్లలను దీర్ఘకాలిక వ్యాధులు వేధిస్తున్నాయి. ఈ నేపథ్యంలో ఇల్లు గడించేందుకు తమ వద్దనున్న వస్తువులను అమ్ముతూ నిత్యవసర సరుకులను తెచ్చుకుంటున్నారు.
"గడిచిన రెండు నెలలు డబ్బులు లేక చాలా ఇబ్బందులు ఎదుర్కొన్నా. పొరపాటున కొన్న వస్తువులను, అవసరం లేని వాటిని ప్రజలు ఈ మార్కెట్ ద్వారా ఇతరులకు ఇస్తూ తమకు కావాలసినవి తీసుకుంటున్నారు."
-ఆండ్రియానా, స్థానికురాలు
ఇదీ చూడండి:2000 ఏళ్లలో ఇవే అత్యధిక ఉష్ణోగ్రతలు
