ఓ స్టూడెంట్ మాస్కు సరిగ్గా ధరించలేదని క్లాసు మధ్యలోనే వెళ్లి పదవీ విరమణ చేశారు 88 ఏళ్ల ప్రొఫెసర్. ఎన్నిసార్లు చెప్పినా ఆమె మాట వినకపోవడం వల్ల రిజైన్ చేసి యూనివర్సిటీ వదిలి వెళ్లిపోయారు. అమెరికాలోని జార్జియా యూనివర్సిటీలో గతవారం ఈ ఘటన జరిగింది.
ఈ యూజీసీ ప్రొఫెసర్ పేరు ఇర్విన్ బెర్న్స్టీన్. జార్జియా యూనివర్సిటీలో సైకాలజీ బోధిస్తున్నారు. ఓ విద్యార్థిని మాస్కును ముక్కు కవర్ చేయకుండా ధరించింది. క్లాసు మొదలైన 5 నిమిషాలకు ప్రొఫెసర్ ఆమెను గమనించి మాస్క్ సరిగ్గా పెట్టుకోవాలని సూచించారు. ఎన్నిసార్లు చెప్పినా ఆ స్టూడెంట్ ప్రొఫెసర్ మాటలను పెడచెవిన పెట్టింది. మాస్కు ముక్కుపైనుంచి ధరిస్తే ఊపిరి పీల్చుకోవడం ఇబ్బందిగా ఉందని చెప్పింది. దీంతో మాస్కు సరిగ్గా ధరించకపోతే రాజీనామా చేసి వెళ్లిపోతానని ఆయన ఆమెను హెచ్చరించారు. కొన్ని క్షణాల పాటు వేచి చూసినా ఆ అమ్మాయి తీరు మారలేదు. 88 ఏళ్ల వృద్ధుడైన తనకు మధుమేహం ఉందని, కొవిడ్ ముప్పు ఎక్కువని విద్యార్థికి చెప్పే ప్రయత్నం చేసినా ఆమె పట్టించుకోలేదు. దీంతో 'అయామ్ రిటైరింగ్' అని తన బ్యాగులో పుస్తకాలు సర్దుకొని ఇర్విన్ వెళ్లిపోయారు.
దేశం కోసం సైన్యంలో పనిచేసినప్పుడు ప్రాణాలను పణంగా పెట్టానని, కానీ ఇప్పుడు మాస్క్ సరిగ్గా ధరించని ఓ నిర్లక్ష్యపు స్టూడెంట్కు క్లాస్ చెప్పి తన జీవితాన్ని రిస్క్ చేయలేనని ప్రొఫెసర్ అన్నారు.
జార్జియా యూనివర్సిటీ విద్యార్థులు మాస్కు ధరించాలని కచ్చితమైన నిబంధన ఏమీ లేదు. అయితే తరగతులు మొదలైన రెండో రోజే ఇద్దరు విద్యార్థులకు పాజిటివ్గా తేలింది. దీంతో తన క్లాస్లులో మాస్కు తప్పనిసరి అని ఇర్విన్ స్పష్టం చేశారు. కొద్ది రోజుల క్రితమే ఈ విషయంపై తన క్లాసు బయట స్టిక్కర్ అంటించారు.
ఇంత జరిగినా ఆ విద్యార్థిని ఏమాత్రం పశ్చాత్తాపపడలేదు. ప్రొఫెసర్ వెళ్లిపోయినందుకు ఆనందించింది.
ఇదీ చూడండి: Afghan Crisis: చైనా చిలుక పలుకులు- తాలిబన్లకు 'దారి' చూపాలట!
