అమెరికాలో కాల్పులు కలకలం రేపాయి. తాజాగా వాషింగ్టన్లోని టకోమాలో జరిగిన కాల్పుల్లో నలుగురు ప్రాణాలు కోల్పోయారు. మరోవైపు మెక్సికోలోని ఓ రెస్టారెంట్లో జరిగిన కాల్పుల్లో ఓ భారతీయ మహిళ ప్రాణాలు వదిలింది.
టకోమా కాల్పుల్లో..
అమెరికాలోని వాషింగ్టన్ టకోమాలో జరిగిన కాల్పుల్లో నలుగురు మరణించారు. ముగ్గురు అక్కడికక్కడే చనిపోగా.. మరో వ్యక్తికి తీవ్ర గాయాలయ్యాయి. దీంతో అతణ్ని స్థానికంగా ఉండే ఆసుపత్రికి తరలించారు. చికిత్స పొందుతూ.. ఆ వ్యక్తి చనిపోయినట్లు పోలీసులు వెల్లడించారు. ఈ ఘటన బుధవారం సాయంత్రం 5.30కు జరిగినట్లు పేర్కొన్నారు. నగరంలోని ఈస్ట్‌సైడ్ ప్రాంతానికి సమీపంలో ఉన్న ఎవెరెట్ స్ట్రీట్‌లోని 4200 బ్లాక్‌లో కాల్పులు జరిగినట్లు పేర్కొన్నారు. స్థానికులు ఆ పరిసర ప్రాంతానికి దూరంగా ఉండాలని కోరారు.
నెబ్రాస్కాలో మరో ఇద్దరు..
అమెరికాలోనే నెబ్రాస్కాలో జరిగిన కాల్పుల్లో ఇద్దరు చనిపోయారు. మరో వ్యక్తికి గాయాలయ్యాయి. ఈ ఘటన మధ్యాహ్నం 2 గంటల ప్రాంతంలో జరిగినట్లు అధికారులు తెలిపారు.
మెక్సికోలో మరో ఇద్దరు..
మెక్సికన్ కరేబియన్ రిసార్ట్ టులమ్‌లోని రెస్టారెంట్లో దుండగులు కాల్పులకు తెగబడ్డారు. ఈ దాడిలో ఇద్దరు విదేశీయులు మరణించినట్లు అధికారులు తెలిపారు. మరో ముగ్గురు తీవ్రంగా గాయపడినట్లు పేర్కొన్నారు. చనిపోయిన వారిలో ఓ భారతీయ మహిళ ఉన్నట్లు చెప్పారు. మరొకరు జర్మనీకి చెందిన మహిళగా.. పోలీసులు గుర్తించారు. గాయపడిన వారిలో కూడా ఇద్దరు జర్మనీ దేశస్థులు కాగా.. ఒకరు నెదర్లాండ్స్కు చెందిన వారిగా వివరించారు.
ఇదీ చూడండి: చైనా 'బొమ్మ'ల్లో ప్రమాదకర రసాయనాలు- భారత్ జాగ్రత్త!
