ప్రపంచాన్ని చుట్టేసిన కరోనా వైరస్ రానున్న రోజుల్లో స్థానిక వ్యాధి(ఎండెమిక్) కానుందని ఓ తాజా అధ్యయనంలో తేలింది. కొవిడ్-19 కారక సార్స్ కోవ్-2 వైరస్ ఎండెమిక్గా మారితే అది సాధారణ జలుబుకు దారి తీస్తుందని, చిన్నతనంలోనే వైరస్ సోకనుందని అధ్యయనంలో వెల్లడైంది. సార్స్ కోవ్-1, నాలుగు జలుబు కారక కరోనా వైరస్లపై చేసిన ఈ అధ్యయనాన్ని సైన్స్ జర్నల్ మంగళవారం ప్రచురించింది.
"చిన్నతనంలోనే వ్యాధి సంక్రమిస్తే పెరిగే కొద్దీ వారికి వైరస్ను ఎదుర్కొనే ఇమ్యూనిటీ పెరుగుతూ వస్తుంది. కానీ, స్థానిక వ్యాధి నుంచి వారు పూర్తిగా బయటపడడం కష్టం" అని ఈ అధ్యయనంలో ప్రధాన పాత్ర పోషించిన అమెరికా ఎమోరీ విశ్వవిద్యాలయ శాస్త్రవేత్త జెన్నీ లావైన్ వివరించారు.
అధ్యయనంలో తెలిసిన మరిన్ని విషయాలు....
3-5 మధ్య వయసు గల చిన్నారుల్లోనే సార్స్ కోవ్-2 ఎండెమిక్ తొలుత సంక్రమించనుందని శాస్త్రవేత్తలు తెలిపారు. వయసుపైబడిన వారికి వైరస్ సోకినా అది ప్రమాదకారి కాకపోవచ్చని అభిప్రాయపడ్డారు. స్థానిక వ్యాధి వ్యాప్తి వ్యవధి ప్రస్తుతం ఉన్న వ్యాక్సిన్లు పెంచే ఇమ్యూనిటీపై ఆధారపడి ఉంటుందని పేర్కొన్నారు.
సీజనల్ వ్యాధులకన్నా సార్స్ కోవ్-2 వల్ల మరణించే వారి సంఖ్య తక్కువగా ఉంటుందని అధ్యయనంలో తెలిసింది. వైరస్ ఎండమిక్గా మారిన అనంతరం పెద్ద మొత్తంలో వ్యాక్సినేషన్ ప్రక్రియను చేపట్టాల్సిన పనిలేదని తేలింది.
