ఇండియా-చైనా సరిహద్దు ఉద్రిక్తతలు మరింత పెరిగితే, అమెరికా అధ్యక్షుడు డొనాల్డ్ ట్రంప్... డ్రాగన్కు వ్యతిరేకంగా భారతదేశానికి మద్దతు ఇస్తారనే గ్యారెంటీ ఏమీ లేదని.. యూఎస్ మాజీ జాతీయ భద్రతా సలహాదారు జాన్ బోల్టన్ అన్నారు.
"మరో నాలుగు నెలల్లోనే అమెరికా అధ్యక్ష ఎన్నికలు జరగనున్నాయి. అందువల్ల ట్రంప్ తన ఎన్నికకు అడ్డంగా ఉన్న (భారత్-చైనా సరిహద్దు వివాదం సహా) ఏ విషయాన్ని అయినా పక్కన పెట్టేయగలరు. అందువల్ల ఒకవేళ భారత్-చైనా సరిహద్దు వివాదం మరింత పెరిగితే.. ట్రంప్ ఇండియాకు కచ్చితంగా మద్దతుగా నిలుస్తారని అనుకోలేం."
- జాన్ బోల్టన్, అమెరికా జాతీయ భద్రత మాజీ సలహాదారు
డొనాల్డ్కు ఏమీ తెలియదు
భారత్-చైనా మధ్య దశాబ్దాలుగా జరుగుతున్న ఘర్షణ గురించి ట్రంప్నకు ఏమీ తెలియదని బోల్టన్ పేర్కొన్నారు. 'బహుశా చైనాతో భౌగోళిక వ్యూహాత్మక సంబంధం గురించి ట్రంప్ ఆలోచిస్తున్నారని అనుకుంటున్నా. ముఖ్యంగా వాణిజ్యం విషయంలో'... అని జాన్ బోల్టన్ పేర్కొన్నారు.
"నవంబర్ ఎన్నికల తరువాత ట్రంప్ ఏమి చేస్తారో నాకు తెలియదు. బహుశా ఆయన మళ్లీ యూఎస్-చైనా వాణిజ్య ఒప్పందంపై దృష్టి సారించవచ్చు."
- జాన్ బోల్టన్
జాన్ బోల్టన్ 2018 ఏప్రిల్ నుంచి 2019 సెప్టెంబర్ వరకు అమెరికా జాతీయ భద్రతా సలహాదారుగా ఉన్నారు.
చైనా దురాక్రమణవాదం
చైనా విస్తరణవాదంతో హద్దుమీరి ప్రవర్తిస్తోందని జాన్ బోల్టన్ విమర్శించారు. తూర్పు, దక్షిణ చైనా సముద్రాలపై, వాటిలోని చిన్న చిన్న ద్వీపాలపై ఆధిపత్యం చెలాయించాలని డ్రాగన్ ప్రయత్నిస్తోందని అన్నారు. ఫలితంగా జపాన్, భారత్తో సహా ఇరుగుపొరుగు దేశాలతో డ్రాగన్ ద్వైపాక్షిక సంబంధాలు బాగా క్షీణించాయని బోల్టన్ పేర్కొన్నారు.
ఇదీ చూడండి: తెరవకపోతే.. పన్ను మినహాయింపు ఉండదంతే: ట్రంప్
