అమెరికా అంతరిక్ష పరిశోధన సంస్థ(నాసా).. 'మార్స్ మిషన్'కు సంబంధించిన కొంత సమాచారాన్ని భారత్కు చెందిన ఇస్రో, చైనాకు చెందిన నేషనల్ స్పేస్ అడ్మినిస్ట్రేషన్లతో పాటు యూఏఈ, యూరోపియన్ స్పేస్ ఏజెన్సీలతోనూ పంచుకుంది. తమ వ్యోమనౌకకు సంబంధించిన వివరాలను వెల్లడించింది. ఆయా దేశాలు కూడా అంగారకునిపై పరిశోధనలు చేపడుతున్నందున.. ఎవరి కార్యక్రమాలకూ అడ్డంకులు, ప్రమాదాలు ఎదురవ్వకుండా ఉండేందుకే ఈ నిర్ణయం తీసుకున్నట్టు నాసా తెలిపింది.
ఈ మేరకు ఆయా అంతరిక్ష సంస్థలు అంగారకునిపై చేపడుతున్న ప్రయోగాల వివరాలను నాసా కోరింది. 'మార్స్ ఆర్బిటర్ మిషన్(మంగళ్యాన్)' పేరుతో ఇస్రో 2013లో పంపిన ప్రోబ్ ఇప్పటికే అంగారకుని కక్ష్యలో తిరుగుతోంది. నాసా పంపిన 'వర్సెవరెన్స్' గత నెలలో అంగారకునిపై అడుగు పెట్టింది. అందులోని రోవర్ ప్రస్తుతం అక్కడి ఉపరితలంపై తవ్వకాలు చేపడుతోంది. చైనా, యూఏఈ, యూరోపియన్ స్పేస్ ఏజెన్సీలు కూడా అంగారక కార్యక్రమం చేపట్టి.. ఇప్పటికే వ్యోమనౌకలు పంపాయి.
ఇదీ చదవండి: అంతరిక్ష రంగంలో సహకారానికి ఇస్రో కసరత్తు
చైనాతో వద్దనుకున్నా...
తమ సాంకేతికత పరిజ్ఞానాన్ని చైనా చౌర్యం చేస్తోందని కొంతకాలంగా మండిపడుతున్న అగ్రరాజ్యం.. మార్స్ మిషన్ విషయంలో మాత్రం ఆ దేశంతో సమాచారం పంచుకోక తప్పలేదు. ఉభయ దేశాలు అంగారకుని వద్దకు వ్యోమనౌకలు పంపిన క్రమంలో.. పరస్పర ప్రయోగాల కారణంగా అక్కడ తమ కార్యక్రమాలకు ఎలాంటి ముప్పు వాటిల్లకూడదని నిర్ణయించుకున్నాయి. తనదుగుణంగా రెండు దేశాల శాస్త్రవేత్తల మధ్య ఈ ఏడాది ప్రారంభంలోనే చర్చలు జరిగినట్టు నాసా అడ్మినిస్ట్రేషన్ స్టీవ్ జుర్జెక్ వెల్లడించారు. అయితే.. కక్ష్యలకు సంబంధించిన సమాచారమే తప్ప ఎలాంటి లోతైన సాంకేతిక విషయాలనూ తాము చైనాతో పంచుకోలేదని ఆయన అన్నారు.
ఇదీ చదవండి: అంగారకుడి గర్భంలో జలసిరి!
