ప్రముఖ విద్యుత్తు కార్ల తయారీ సంస్థ టెస్లా అధినేత ఎలాన్ మస్క్కు కోర్టులో చుక్కెదురైంది. మస్క్ తనకు పరువు నష్టం కలిగించాడని ఆరోపిస్తూ ఓ వ్యక్తి దాఖలు చేసిన దావాపై న్యాయస్థానం విచారణ జరిపింది. అయితే.. ఫిర్యాదు దారుడు దాఖలు చేసిన ఆరోపణలు నిరాధారమైనవని, తన భావ ప్రకటన స్వేచ్ఛకు భంగం కలిగించేలా ఉందనే మస్క్ వాదనను న్యాయమూర్తి తోసిపుచ్చారు.
అసలేం జరిగింది?
మిషిగాన్ యూనివర్సిటీలో గ్రాడ్యుయేట్ విద్యార్థి రణ్దీప్ హోతి. 2019 ఫిబ్రవరిలో కాలిఫోర్నియా, ఫ్రీమోంట్లోని టెస్లా విక్రయ కేంద్రంలోకి కార్లపై అధ్యయనం చేసేందుకు వెళ్లగా.. భద్రతా సిబ్బంది అతడిని అడ్డుకున్నారు. అదే ఏడాది ఏప్రిల్లో అతను కారులో వెళ్తుండగా.. టెస్లా టెస్టు కారు ఫొటోలను తీశాడు. ఆ తర్వాత వాటిని ఆన్లైన్లో పోస్ట్ చేశాడు. ఈ రెండు సంఘటనలు.. మస్క్ ఆగ్రహానికి కారణమయ్యాయి.
అనంతరం.. హోతిపై ఆన్లైన్ టెక్ ఎడిటర్కు మస్క్ ఫిర్యాదు చేశారు. హోతి తన కారులో దూసుకొచ్చి, తమ ఉద్యోగులపై హత్యాయత్నానికి పాల్పడ్డాడని పేర్కొన్నారు. అతడు అబద్ధాలకోరని చెప్పాడు.
పరువునష్టం దావా..
అయితే.. మస్క్ తనపై ఆన్లైన్లో విద్వేషాన్ని ప్రచారం చేస్తున్నాడని అలమెడా కౌంటీ సుపీరియర్ కోర్టులో హోతి.. అదే ఏడాది ఆగస్టులో పరువునష్టం దావా దాఖలు చేశాడు. దీనిపై తాజాగా న్యాయస్థానం విచారణ జరిపింది.
తాను ప్రజా ప్రయోజనం దృష్ట్యానే హోతిపై ఆ వ్యాఖ్యలు చేశానని అందుకే ఆ దావాను కొట్టివేయాల్సిందిగా న్యాయమూర్తిని మస్క్ అభ్యర్థించారు. వాదనలు విన్న న్యాయమూర్తి జస్టిస్ జులియా స్పెయిన్.. మస్క్ వాదనల్లో నిజాన్ని తేల్చాల్సి ఉందని లిఖిత పూర్వక తీర్పులో పేర్కొన్నారు.
