తొలిసారి నేరుగా నిర్వహిస్తున్న క్వాడ్ సదస్సులో పాల్గొనేందుకు అమెరికాలో పర్యటిస్తున్న ప్రధాని మోదీ.. గురువారం ఆస్ట్రేలియా ప్రధాని స్కాట్ మోరిసన్తో భేటీ అయ్యారు. ఆర్థిక సంబంధాలను బలోపేతం చేసుకోవడం, ప్రజల మధ్య సంబంధాలను మెరుగుపర్చుకోవడం వంటి అంశాలపై వారు చర్చించారని ప్రధానమంత్రి కార్యాలయం ట్విట్టర్ వేదికగా తెలిపింది.
"భారత్-ఆస్ట్రేలియా మధ్య మైత్రి బంధాన్ని మరింత మెరుగుపరుచుకునే లక్ష్యంగా ఇరు దేశాల ప్రధానుల మధ్య చర్చలు జరిగాయి. రెండు దేశాల మధ్య ఆర్థిక సంబంధాలను బలోపేతం చేసుకోవడం, ప్రజల మధ్య సంబంధాలను మెరుగుపర్చుకోవడం వంటి అంశాలపై వారు చర్చించారు."
-ప్రధానమంత్రి కార్యాలయం
భారత్-అమెరికా సమగ్ర వ్యూహాత్మక భాగస్వామ్యంపై ఆస్ట్రేలియా ప్రధాని, మోదీల మధ్య ఫోన్ కాల్ సంభాషణ జరిగిన వారం తర్వాత.. వీరిరువురి మధ్య ప్రత్యక్ష భేటీ జరగడం ఇదే తొలిసారి.
'ఇదో కొత్త అధ్యాయం'
మోదీ, మోరిసన్ల మధ్య భేటీ.. ఆస్ట్రేలియాతో సమగ్ర వ్యూహాత్మక భాగస్వామ్యంలో సరికొత్త అధ్యాయం అని విదేశాంగ శాఖ ప్రతినిధి అరిందమ్ బాగ్చి ట్విట్టర్ వేదికగా తెలిపారు.
"ఆస్ట్రేలియాతో భారత్ సమగ్ర వ్యూహాత్మక భాగస్వామ్యంలో ఇదో సరికొత్త అధ్యాయం. ప్రధాని మోదీ, ఆస్ట్రేలియా ప్రధాని మోదీ సమావేశమయ్యారు. ప్రాంతీయ, అంతర్జాతీయ పరిణామాలపై వారు చర్చించారు. కొవిడ్-19, వాణిజ్య, రక్షణ, శుద్ధ ఇంధనం సహా వివిధ అంశాల్లో ద్వైపాక్షిక సహకారంపై వారు చర్చలు జరిపారు."
- అరిందమ్ బాగ్చి, విదేశాంగ శాఖ ప్రతినిధి
ఇటీవల ఇరుదేశాల విదేశాంగ మంత్రులు, రక్షణ మంత్రుల మధ్య దిల్లీలో జరిగిన 'టు ప్లస్ టు' చర్చల తర్వాత మోదీ, మోరిసన్ల మధ్య సమావేశం జరగడం గమనార్హం.
ఇండో పసిఫిక్ ప్రాంతంలో చైనా దూకుడు కళ్లెం వేసే లక్ష్యంతో ఆస్ట్రేలియా, బ్రిటన్, అమెరికా కలిసి 'ఆకస్' పేరుతో త్రైపాక్షిక కూటమిని ఏర్పాటు చేసిన తర్వాత మోదీ మోరిసన్ల మధ్య భేటీ జరగడం ప్రాధాన్యం సంతరించుకుంది.
ఇదీ చూడండి: 'ఆకస్' కూటమిలోకి భారత్- అమెరికా ఏమందంటే?
ఇదీ చూడండి: Modi us visit 2021: అమెరికాలో ప్రధాని మోదీకి ఘన స్వాగతం
