అమెరికాలో మరోసారి తుపాకీ పేలింది. మిలవౌకీ నగరంలోని ఓ ఇంట్లో ఐదుగురు విగత జీవులుగా పడి ఉండటాన్ని పోలీసులు గుర్తించారు. వీరిని ఎవరో కాల్చి చంపినట్లు తెలిపారు అధికారులు.
"ఉదయం 10.30 గంటల సమయంలో అత్యవసర నంబర్ 911కు కాల్ వచ్చింది. తన కుటుంబంలోని ఐదుగురు చనిపోయారని ఓ వ్యక్తి చెప్పాడు. వెంటనే ఇంటికి వెళ్లి చూడగా ఐదు మృతదేహాలు ఉన్నాయి. వారంతా 14 నుంచి 41 మధ్య వయస్కులే. "
- టామ్ బారెట్, మేయర్
శిశువును విడిచిపెట్టి..
ఆ ఇంట్లో ఓ శిశువు మాత్రం ప్రాణాలతో ఉందని మేయర్ తెలిపారు. హంతకుడు ఆ చిన్నారిని వదిలేసి ఉంటాడని భావిస్తున్నామన్నారు. ఘటనాస్థలం నుంచి ఆయుధాన్ని స్వాధీనం చేసుకున్న పోలీసులు.. ఈ ఘాతుకానికి పాల్పడింది ఒక్కడేనని అంచనాకు వచ్చారు.
ప్రాథమిక విచారణలో భాగంగా ఫోన్ చేసిన వ్యక్తిని కస్టడీలోకి తీసుకున్నట్లు తెలిపారు అధికారులు. బాధిత కుటుంబానికి అతనికి సంబంధం ఏంటనే కోణంలో విచారిస్తున్నారు.
ఈ ఏడాది రెండోది..
మిల్వౌకీలో ఈ ఏడాది జరిగిన రెండో కాల్పుల ఘటన ఇది. ఫిబ్రవరి 26న ఓ వ్యక్తి తన ఐదుగురు సహోద్యోగులను చంపి తనను తాను కాల్చుకున్నాడు. 2012లో జాత్యాంహకార వాది మైఖేల్ పేజ్.. సిక్కుల ఆలయం వద్ద ఏడుగురిని కాల్చిచంపాడు. అనంతరం పోలీసుల అతనిని మట్టుబెట్టారు.
2005లో జరిగిన ఘటనను మిల్వౌకీలోనే అతిపెద్దది చెప్పుకొంటారు. బ్రూక్ఫీల్డ్ ప్రాంతంలోని చర్చిలో టెర్రీ మైఖేల్ రాట్జ్మన్ అనే వ్యక్తి ఏడుగురిని కాల్చి.. తనను తాను కాల్చుకున్నాడు. ఇప్పటివరకు ఈ ఘటనకు కారణాలు తెలియరాలేదు.
ఇదీ చూడండి: 'లాక్డౌన్ ముసుగులో యువతకు ఉగ్రమూకల ఎర'
