గాలి తుంపర్ల ద్వారా వ్యాపించే కరోనా వైరస్ను నానోఫైబర్ ఫిల్టర్లు పూర్తి స్థాయిలో అడ్డుకోగలవని తాజా పరిశోధనలో రూఢి అయింది. పాలిమర్ సూక్ష్మ దారాలను ఉపయోగించి శాస్త్రవేత్తలు ఈ ఫిల్టర్లను తయారు చేశారు. కరోనా సోకిన వ్యక్తి మాట్లాడినా, దగ్గినా, తుమ్మినా, చీదినా, పాడినా.. ముక్కు, నోటి నుంచి వెలువడే గాలి తుంపర్లలో కలిసి వైరస్ బయటకు వస్తుంది. తర్వాత గాలిలో ప్రయాణించి సమీపంలో ఉన్న వ్యక్తులకు సోకుతుంది. మాస్కులు ధరించడం ద్వారా ఈ వైరస్ను అడ్డుకోవచ్చు. అయితే.. ప్రస్తుతం అందుబాటులో ఉన్న మాస్కులేవీ వైరస్ను మహమ్మారి నుంచి పూర్తిస్థాయి రక్షణ కల్పించటం లేదు. దీంతో యూసీ రివర్సైడ్, ద జార్జ్ వాషింగ్టన్ వర్సిటీ ఇంజినీరింగ్ పరిశోధకులు దీనిపై దృష్టి సారించారు.
"తల వెంట్రుక మందంలో 167వ భాగమంతా సన్నగా ఉండే స్పన్ దారాల గుండా ఒక్క చుక్క ద్రవరూప పాలీవినిలిడెన్ ఫ్లోరైడ్ను, హెచ్చుస్థాయి విద్యుత్తును ప్రసరింప చేయడం ద్వారా నానోఫైబర్ ఫిల్టర్లను తయారు చేశాం. ఎలక్ట్రోస్పిన్నింగ్గా పిలిచే ఈ ప్రక్రియ ఖర్చుతో కూడుకున్న వ్యవహారం. మాస్కుల తయారీలో, వాయు నియంత్రణ వ్యవస్థల్లో భారీగా ఉపయోగించడానికి ఇది అనువుగా ఉంటుంది. సాధారణ మాస్కులు గాలి తుంపర్లలోని కరోనా వైరస్ను 45%-73% వడపోస్తే.. సర్జికల్ మాస్కులు 98% రక్షణ కల్పిస్తున్నాయి. మేము తయారు చేసిన నానో ఫైబర్ ఫిల్టర్లు 99.9% కంటే ఎక్కువగా వైరస్ను అడ్డుకుంటున్నాయి."
-యాన్ షెన్, పరిశోధనకర్త.
ఈ నానోఫైబర్ ఫిల్టర్లతో తయారైన మాస్కులను ధరిస్తే శ్వాస తీసుకోవడం కూడా సులభంగా ఉంటుందట!
ఇదీ చూడండి: వీడని వూహాన్ ల్యాబ్ మిస్టరీ!
ఇదీ చూడండి: భారత్ ప్రతిస్పందనపై సింగపూర్ సంతృప్తి
