అమెరికాలో మూడో కరోనా వ్యాక్సిన్ అందుబాటులోకి వచ్చింది. ఒకే డోసుతో కరోనాను నివారించేలా జాన్సన్ అండ్ జాన్సన్ తయారు చేసిన టీకా వినియోగానికి అమెరికా ఆహార, ఔషధ(ఎఫ్డీఏ) నియంత్రణ సంస్థ అనుమతి ఇచ్చింది.
85 శాతం సమర్థత!
వైరస్కు వ్యతిరేకంగా ఈ టీకా బలమైన రక్షణ అందిస్తోందని ఎఫ్డీఏ పేర్కొంది. తీవ్రంగా జబ్బుపడటాన్ని, మరణాలను నివారిస్తుందని తెలిపింది. తీవ్రమైన కొవిడ్కు వ్యతిరేకంగా 85 శాతం సమర్థతతో ఈ టీకా పనిచేస్తుందని వెల్లడించింది. మూడు ఖండాల్లో టీకాపై పరీక్షలు జరిగాయని, దక్షిణాఫ్రికా వంటి దేశాల్లోనూ వ్యాక్సిన్ మంచి పనితీరు కనబర్చిందని ఎఫ్డీఏ స్పష్టం చేసింది.
టీకా వినియోగానికి అనుమతులు లభించిన నేపథ్యంలో సోమవారం నుంచే డోసుల పంపిణీ ప్రారంభం కానుంది. మార్చి చివరి నాటికి 2 కోట్లు, వేసవి నాటికి 10 కోట్ల డోసులను సరఫరా చేయనున్నట్లు సంస్థ తెలిపింది.
గత గురువారం బహ్రెయిన్ దేశం ఈ టీకా వినియోగానికి ఆమోదం తెలిపింది. ఐరోపా, ఐరాసల నుంచీ అత్యవసర అనుమతులు పొందాలని సంస్థ ప్రయత్నిస్తోంది. ఈ ఏడాది చివరి నాటికి 100 కోట్ల డోసులు ఉత్పత్తి చేయడమే లక్ష్యంగా పెట్టుకుంది.
ఇదీ చదవండి: బ్రిటన్లో జాన్సెన్ టీకా మూడో దశ ట్రయల్స్
