కరోనా నియంత్రణ చర్యలపై అమెరికా విదేశాంగ మంత్రి మైక్ పాంపియోతో భారత విదేశీ వ్యవహారాల మంత్రి జైశంకర్ ఫోన్లో మాట్లాడారు. అంతర్జాతీయంగా నెలకొన్న సమస్యలు, ద్వైపాక్షిక సహకారంపై చర్చించారు. వీటితో పాటు ఇండో పసిఫిక్ ప్రాంతంలో పరిస్థితులపై ఇరువురు చర్చించినట్లు అమెరికా అధికారులు వెల్లడించారు.
ప్రపంచవ్యాప్తంగా శాంతి, శ్రేయస్సు, భద్రత పెంపొందించడానికి భారత్-అమెరికా మధ్య దృఢమైన సంబంధాల ఆవశ్యకతను నేతలిద్దరు నొక్కి చెప్పినట్లు అమెరికా విదేశాంగ శాఖ ప్రిన్సిపల్ డిప్యూటీ ప్రతినిధి కేల్ బ్రౌన్ పేర్కొన్నారు. చైనా తన ప్రాబల్యాన్ని పెంచుకోవాలని చూస్తున్న ఇండో-పసిఫిక్ ప్రాంతంలో సహకారాన్ని మరింత విస్తృతం చేసే మార్గాలను అన్వేషించినట్లు తెలిపారు.
"ప్రాంతీయ, అంతర్జాతీయ సమస్యలపై పూర్తిస్థాయిలో సహకారం కొనసాగించాలని ఇరువురు నేతలు అంగీకారానికి వచ్చారు. భారత్- అమెరికా మధ్య ఈ ఏడాది చివర్లో జరిగే 2+2 చర్చల కోసం ఆసక్తిగా ఎదురుచూస్తున్నారు."
-కేల్ బ్రౌన్, అమెరికా విదేశాంగ శాఖ ప్రిన్సిపల్ డిప్యూటీ ప్రతినిధి
అంతర్జాతీయ సమస్యలతో పాటు అఫ్గాన్లో శాంతి స్థాపన ప్రక్రియపైనా జైశంకర్, పాంపియో చర్చించినట్లు బ్రౌన్ తెలిపారు.
