అమెరికాతో పాటు ఇతర దేశాల్లో వేగంగా వ్యాపిస్తోన్న డెల్టా వేరియంట్ నుంచి తమ సింగిల్ డోస్ టీకా రక్షణ కల్పిస్తోందని జాన్సన్ అండ్ జాన్సస్ సంస్థ ప్రకటించింది. డెల్టా వేరియంట్తో పాటు సార్స్-కోవ్-2 వైరల్ వేరియంట్లను సమర్థవంతంగా ఎదుర్కొనేందుకు బలమైన యాంటీబాడీలను ఉత్పత్తి చేసేందుకు దోహదపడుతున్నట్లు తెలిపింది.
అలాగే.. ఈ టీకా ద్వారా ఎనిమిది నెలల పాటు వైరస్ నుంచి రక్షణ ఉంటుందని పేర్కొంది జాన్సన్ అండ్ జాన్సన్. సింగిల్ డోస్ టీకాపై ప్రయోగశాలల్లో చేపట్టిన రెండు పరిశోధనలకు సంబంధించిన ఫలితాలను బయోఆర్షివ్కు అందించింది.
"జాన్సన్ అండ్ జాన్సన్ వ్యాక్సిన్ సామర్థ్యాన్ని కొత్తగా ప్రకటించిన అధ్యయనాలు నిరూపించాయి. మా వ్యాక్సిన్ ఎక్కువకాలం కొవిడ్ నుంచి రక్షణ ఇస్తుందని, డెల్టా వేరియంట్లను అడ్డుకుంటోందని నమ్ముతున్నాం. మా సింగిల్ డోస్ వ్యాక్సిన్ బహుళ వేరియంట్లపై సమర్థవంతంగా పనిచేస్తున్నట్లు తాజా అధ్యయనం చెబుతోంది."
- పాల్ స్టోఫెల్స్, ఎండీ జాన్సన్ అండ్ జాన్సన్.
సింగిల్ డోస్ టీకాపై ఎనిమిది నెలలపాటు అధ్యయనం చేపట్టినట్లు తెలిపారు జాన్సన్ పరిశోధన అభివృద్ధి సంస్థ ఎండీ మథాయ్ మమ్మెన్. బలమైన యాంటీబాడీలు ఉత్పత్తి అవుతున్నాయని, సమయం గడిచిన కొద్ది ఆ దిశగా పురోగతి కనిపించినట్లు తెలిపారు. కరోనా మహమ్మారి కట్టడిలో తమ టీకా కీలక పాత్ర పోషిస్తుందని ఆశాభావం వ్యక్తం చేశారు. కొవిడ్కు వ్యతిరేకంగా 85 శాతం సమర్థతతో ఈ టీకా పనిచేస్తుందని వెల్లడించారు. మూడు ఖండాల్లో టీకాపై పరీక్షలు జరిగాయని, దక్షిణాఫ్రికా వంటి దేశాల్లోనూ వ్యాక్సిన్ మంచి పనితీరు కనబర్చిందని స్పష్టం చేశారు.
జాన్సన్ అండ్ జాన్సన్ వ్యాక్సిన్ ఇప్పటికే చాలా దేశాల్లో అందుబాటులోకి వచ్చింది. ఫిబ్రవరి 27న అమెరికాలో అత్యవసర వినియోగానికి అనుమతులు లభించాయి. మార్చ్ 11న ఐరోపాలో అనుమతులు వచ్చాయి.
ఇదీ చూడండి: వైరస్ నుంచి రక్షణకు 'సింగిల్ డోస్' వ్యాక్సిన్
