అమెరికా సియాటెల్లో 2021లో భారత 75వ స్వాతంత్ర్య వేడుకలను ఘనంగా నిర్వహించాలని ప్రవాస భారతీయులు భావించారు. 20 వేల మందితో నిర్వహించే కార్యక్రమానికి వాషింగ్టన్ గవర్నర్ జే రాబర్ట్ ఇన్స్లేను ముఖ్య అతిథిగా ఆహ్వానించాలని నిర్ణయించారు.
ప్రవాస భారతీయుల ప్రతినిధి టి.జి.విశ్వప్రసాద్ నిర్వహించిన వర్చువల్ ఫండ్ రైజర్ కార్యక్రమంలో వాషింగ్టన్ గవర్నర్ జే రాబర్ట్ ఇన్స్లే పాల్గొన్నారు.
ఈ కార్యక్రమంలో ఆర్టికల్ 370 రద్దు నిర్ణయంపై మాట్లాడిన ఇన్స్లే.. ఇతర దేశాల వ్యవహారాల్లో జోక్యం చేసుకోవటం వ్యర్థమని పేర్కొన్నారు. తమ పరిధిలో ఉన్న సమాజానికి సేవలందించటంపై దృష్టి సారించాలని వ్యాఖ్యానించారు. ప్రతి దేశానికి సొంత సమస్యలు ఉంటాయని, వాటిపై అంతర్గతంగా దృష్టి సారించాలని సూచించారు.
ఇన్స్లేకు ప్రశంసలు..
ఈ సమావేశంలో ఇన్స్లేపై ప్రవాస భారతీయులు ప్రశంసలు కురిపించారు. రాష్ట్ర ఆర్థిక వ్యవస్థ నిర్మాణంతోపాటు రాష్ట్ర సాంస్కృతిక గుర్తింపును సుసంపన్నం చేయడంలో గవర్నర్ కీలక పాత్ర పోషించారని అన్నారు. కరోనా మహమ్మారిని ఎదుర్కోవడంలో ప్రభుత్వం ఎంతో సమర్థంగా పనిచేశామని ఇన్స్లే వివరించారు.
రాష్ట్రంలో భారత్కు చెందిన ఒక ప్రతినిధి బృందాన్ని 2021లో ఏర్పాటు చేయాలని ఇన్స్లేను విశ్వప్రసాద్ కోరారు. ఈ విషయంలో సానుకూలంగా స్పందించిన ఇన్స్లే.. విశ్వప్రసాద్ ప్రతిపాదనకు మద్దతు తెలిపారు.
ఇదీ చూడండి: మెలానియా VS జిల్‌.. గెలిచేదెవరో పజిల్‌!
