కరోనా సంక్షోభం నెలకొన్న వేళ... సౌర విద్యుత్ వేలం మంచి ఆదరణ పొందింది అనడానికి భారత్ ఓ మంచి ఉదారహణగా నిలిచిందని ఐక్యరాజ్యసమితి ప్రధాన కార్యదర్శి ఆంటోనియో గుటెరస్ పేర్కొన్నారు.
"ఇప్పుడిప్పుడే మార్పునకు బీజాలు పడుతున్నాయి. పునరుత్పాదక శక్తి ఒక్కటే 2020లో వృద్ధి చెందగల ఏకైక ఇంధన వనరు. కరోనా సంక్షోభం వేళ సౌర విద్యుత్ వేలం మంచి ఆదరణ పొందింది. దీనికి భారత్ ఓ మంచి ఉదాహరణ. పునరుత్పాదక శక్తి వనరులు... సంప్రదాయ శిలాజ ఇంధనాల వనరుల కంటే మూడు రెట్లు ఎక్కువగా ఉద్యోగ, ఉపాధి అవకాశాలు కల్పించగలవు."
- ఆంటోనియో గుటెరస్, ఐరాస ప్రధాన కార్యదర్శి
అంతర్జాతీయ ఇంధన సంస్థ క్లీన్ ఎనర్జీ ట్రాన్స్మిషన్ సమ్మిట్లో... గుటెరస్ ఈ వ్యాఖ్యలు చేశారు. అభివృద్ధి చెందుతున్న దేశాల్లో బొగ్గు ఆధారిత ఇంధన ఉత్పత్తికి... ఫైనాన్స్ చేయడం ఆపాలని ఆయన అంతర్జాతీయ సమాజానికి విజ్ఞప్తి చేశారు.
"కరోనా సంక్షోభం నుంచి గట్టెక్కే ప్రణాళికలో బొగ్గుకు స్థానం లేదు. 2050 నాటికి కర్బన ఉద్గారాలను నికరంగా సున్నా స్థాయికి తీసుకొచ్చేందుకు ప్రపంచ దేశాలు కట్టుబడి ఉండాలి. వచ్చే ఏడాది నిర్వహించే సీఓపీ-26 కంటే ముందు... మరింత మంచి జాతీయ వాతావరణ ప్రణాళికను రూపొందించాల్సి ఉంది."
- ఆంటోనియో గుటెరస్, ఐరాస ప్రధాన కార్యదర్శి
అదానీ గ్రీన్ ఎనర్జీ
గత నెలలో అదానీ గ్రీన్ ఎనర్జీ... సోలార్ ఎనర్జీ కార్పొరేషన్ ఆఫ్ ఇండియా (ఎస్ఈసీఐ)తో రూ.45,000 కోట్ల విలువైన సౌర ఒప్పందాన్ని కుదుర్చుకుంది. దీని ప్రకారం, అదానీ గ్రీన్ ఎనర్జీ దేశంలో 8 గిగావాట్స్ విద్యుత్ ఉత్పత్తి సామర్థ్యం, 2 గిగావాట్ల పరికరాల తయారీ సదుపాయాన్ని అభివృద్ధి చేయనుంది.
వాతావరణ అనుకూల చర్యలు
కరోనా సంక్షోభం నుంచి తమ ఆర్థిక వ్యవస్థలను రక్షించుకునేందుకు, పునర్నిర్మించుకునేందుకు, రీసెట్ చేసేందుకు ప్రయత్నిస్తున్న ప్రపంచ దేశాలు.. వాతావరణ సానుకూల చర్యలను కూడా పరిగణనలోకి తీసుకోవాలని గుటెరెస్ విజ్ఞప్తి చేశారు.
పారిస్ ఒప్పంద లక్ష్యాలను సాధించేందుకు ప్రపంచ దేశాలు కృషి చేయాలని గుటెరస్ విజ్ఞప్తి చేశారు. ఇందుకు అనుగుణంగానే విమాన, నౌకాయానాలకు, పరిశ్రమలను ప్రోత్సహించాలని కోరారు.
ఇదీ చూడండి: ప్రపంచవ్యాప్తంగా కరోనా రికార్డు.. కొత్తగా 2లక్షల22వేల కేసులు
