కరోనాకు హైడ్రాక్సీక్లోరోక్విన్ ఔషధం పనిచేస్తోందని కొంత మంది వైద్యులు సూచిస్తున్నారు. అదే సమయంలో దీని వాడకం వల్ల హృద్రోగ సమస్యలు తలెత్తుతున్నాయని పలు అధ్యయనాలు వెల్లడిస్తున్నాయి. ఆంటీబయాటిక్ అజిత్రోమైసిన్తో కలిపి ఈ మలేరియా మందును వాడటం మరింత ప్రమాదకరమని తేల్చాయి.
తాజాగా జరిగిన మరో అధ్యయనం కూడా ఇదే రకమైన ప్రమాదాన్ని గుర్తించింది. కరోనా చికిత్సలో ఈ రెండు ఔషధాలను వాడితే హృదయనాళ వ్యవస్థపై తీవ్ర ప్రభావం పడుతుందని గుర్తించారు అమెరికాలోని వాండర్బిల్ట్, స్టాన్ఫోర్డ్ విశ్వవిద్యాలయాల పరిశోధకులు.
కరోనాకు ముందే..
ప్రపంచ ఆరోగ్య సంస్థ డేటాబేస్లోని 2.1 కోట్ల తీవ్రమైన కేసుల నివేదికలపై అధ్యయనం చేశారు పరిశోధకులు. ఈ చికిత్స నివేదికలు 1967 నవంబర్ 14 నుంచి 2020 మార్చి 1 మధ్య కాలంలో 130 దేశాల్లోని వివిధ వ్యాధులకు సంబంధించినవని తెలిపారు. ఈ అధ్యయనం సర్క్యులేషన్ అనే జర్నల్లో ప్రచురితమైంది.
హైడ్రాక్సీక్లోరోక్విన్, అజిత్రోమైసిన్.. లేదా రెండు ఔషధాల కలిపి వాడటం వల్ల రోగులలో ఉత్పన్నమైన సమస్యలు హృదయనాళాలపై ఔషధ ప్రతికూలతలు (CV-ADR)తో సరిపోల్చుకున్నారు. హృదయనాళాల ప్రక్రియలపై ప్రభావం చూపే ఔషధాల వల్ల తీవ్రమైన కార్డియాక్ ప్రోరిత్మోజెనిక్ సమస్యలు తలెత్తుతాయి. హెచ్సీక్యూ, అజిత్రోమైసిన్ వాడకం వల్ల కూడా ఇవే సమస్యలు ఉత్పన్నమవుతున్నట్లు గుర్తించారు.
"హైడ్రాక్సీక్లోరోక్విన్ను నెలల తరబడి తీసుకోవటం వల్ల తీవ్రమైన గుండె వైఫల్యాలకు దారి తీస్తుంది. 76,822 మంది హైడ్రాక్సీ వాడగా.. వీరిలో 21 వేల మందిపై ఈ ఔషధం ప్రాణాంతకంగా మారింది. అజిత్రోమైసిన్ 89,692 మందిపై ప్రయోగించగా.. 54 వేల మందిపై తీవ్ర ప్రభావం కనిపించింది. 607 మందిపై ఈ రెండు ఔషధాలు కలిపి ప్రభావం చూపాయి."
- పరిశోధకులు
పరీక్షల నిలిపివేత..
ఇప్పటికే కరోనా బాధితులకు హైడ్రాక్సీ క్లోరోక్విన్‌ ఇస్తూ వివిధ దేశాల్లో నిర్వహిస్తున్న క్లినికల్‌ పరీక్షల్ని తాత్కాలికంగా నిలిపివేయాలని డబ్ల్యూహెచ్ఓ నిర్ణయించింది. కొవిడ్‌-19 బాధితులకు ఈ మందు వాడితే వారు మరణించే ముప్పు ఉంటుందని ఒక అధ్యయనం చెప్పటం వల్ల ఈ నిర్ణయం తీసుకున్నామని డబ్ల్యూహెచ్ఓ డైరెక్టర్‌ జనరల్‌ టెడ్రోస్‌ అధనోమ్‌ వెల్లడించారు.
